以前在不同辦公地方，經常聽見阿A窒阿B：「做咩呀？博同情咩， ？」
係咪難聽過粗口？絕對係。但又絕對赤裸裸講出辦公室的現實——冇得博同情！若你欠表現，交不出成績，絕對冇人會同情你，因再下去，除 你被淘汰，更可能令成隊人被你累到攬炒！故此，冇人會畀超過正常的時間與空間你去進步。
今日我講邊個？正是兩年前以新西蘭冠軍練馬師榮譽來香港的黎昭昇。
到港前，單單睇佢的輝煌戰績，已顯示好打得，屬神童級，因26歲已成冠軍練馬師，贏盡當地無數大賽，亦曾經一季勝出一百六十場頭馬，刷新新西蘭歷來紀錄，要幾威有幾威。
年紀輕輕而有如此亮麗CV，馬會當然希望羅致到港大展拳腳，協助提升本地賽事水平。
初到港時，大量馬主慕名將馬拉往黎廄，而佢亦曾經以養馬費收得最貴被「傳頌一時」。
第一季勝出三十五場頭馬，成績中等，但冇人會苛求。去到第二季，成績滑落到三十一場，開始有聲音揶揄佢「貨不對辦」，令黎昭昇大受打擊，似乎有點意志消沉。
好啦，踏入今季，有點大鑊。因部分馬主已冇耐性，開始將馬拉倉。更弊，發生兩件事，第一宗為「魔術控制」，在黎廄一戰輸五個多馬位，一轉巫廄，首次亮相即輕風送爽按韁勝出。
第二宗上周日發生，「愛心神駒」在黎廄N次食白果，一轉廖廄，即可如飛殺上W出，爆近十四倍冷門。
你話 ，若你係黎廄馬主，會點諗點做？
今晚跑泥地，冇乜好玩仍要玩，獨捧阿妹黃寶妮五班的「帝豪歡星」，上月尾第一次跑泥地短途，幾乎爆出。今次可減十磅，細W大P可也。
