專欄日日寫，當然要搵題材。報業大旺時，有老友同一日用五個筆名 七個專欄，真係人都癲，點搞？老江湖有一招叫「撩交打」！並非真的拳來腳往打到面腫出血，而是開打「筆戰」：「阿碌，我冇 寫時，就搵個專欄老友，就一個敏感話題扮鬧交開筆戰，加鹽加醋七情上面，動晒真氣咁出招。讀者乃街邊牛叔珠嬸，天性八卦，最喜歡見街上MMA（綜合格鬥），咁就可以 機狂拍低，即傳畀老友，另一方面又大嗌——唔好打啦！『筆戰』開打，正似如此！」
此乃幾十年前流行做法，我當然唔試，因從來唔同人鬧交打交，傷身傷氣。寫專欄？思潮源源不絕，從未乾塘，點會咁老套扮同人鬧交，博讀者好奇睇？
所以，當前朝N咁多「好奇友」來訊息：「喂喂，青姐講你呀！」我幾大飲埋杯奶茶，歎埋件蛋治先睇。
哦 乜咁益我呀？賺硬稿費喎。原來老友青姐乃小弟專欄及Facebook讀者，犀利到連留言都睇埋（我大部分冇睇 ），指出早前我論及灣仔某酒樓的「完美燒豬」，被留言大罵。我錯我錯，實在不應和盤托出大部分中式食肆的真像，正是水準飄忽不定。原因：一、大廚放假；二、周五六日忙到飛起；三、周三周日跑馬；四、大廚交徒弟落鑊。單以上四點，已足令出品水準下跌。
再者，任何食肆皆珍惜熟客，米飯班主也，故此有特別好 ，當然預留。我食到一級豬，除避開以上四點外，更向酒樓聲明畀多點錢，兼早一個半月預訂，煩搜羅頂級材料。
老友，你想生兜兜撞入去，就有同一出品同一水平，若冇就Blacklist人 ？是否剛出世？
