今日標題，乃由我想到早年讀到的一種兵法啟發……且戰且走。
投資股票，純粹金錢遊戲一場，大忌為對股票發生感情（非常普遍現象），成日攬住佢唔放。
記住，股票不是家人，也不是老友，絕對無需要講感情。應分手時就要決絕地分手；但當其有存在價值時，也應當機立斷適時擁有。
升市不會永遠不停
最近好煩，因N咁多老友問：第一是股市咁升法，是否應揸多啲，否則蘇州過後冇艇搭？第二是否應趁人大政協開會，谷到個市澎澎聲升，立時止賺落車？
個人從來堅持，投資前須學懂分析及獨立思考，更重要，懂得看事以常識及歷史兩個角度出發。
我的口訣非常簡單：且升且沽，且跌且揸。升市不會永遠不停，但冇人知會幾時停，因大家皆非神仙。所以投資者應有個心中價，去到邊個價位就應邊升邊沽。
小弟最喜歡用港交所（388）作為例子，我的買入價位長期是280元以下，越跌越買，若有機會跌到220元以下就「曬冷」，用盡一切資金掃貨。相反，升到320元就開始沽，每升20元沽500股，直至清倉。
這個策略，令我在去年及今年已賺到非常可觀利潤，大家可睇睇港交所過去15個月走勢圖，已清楚「食」咗幾多個浪。
鎖定利潤改存定期
股市經常有很多假象，市場反應也有很多是過敏的，例如人大政協上周開會，國家當然想體體面面喜氣洋洋，這種心態由上而下，當然有不少「春江鴨」早早趁勢搭升市順風車。佢哋一出手，散戶當然見升就即跟，於是造成一個牛市現（假？）象。
冷靜的投資者，會先分析一下，究竟中國及香港經濟形勢，是否大好？好到每日升幾百點而又能繼續？
若你有理論基礎去支持是應該狂升的，那麼當然應該吸納一些實力股。相反，若閣下有根有據的觀察，認為升市有相當大的虛火成分，就應趁群眾懵懵地炒高已時收割了。
今次，我看不到升市有很大底氣，故決定且高且沽，先鎖定利潤改存定期，再思考如何行下去。
資深傳媒人 曾智華
相關文章：
