本來以為佢早已歸隱，因67歲了，兼且多年冇在幕前「磨劍」，點鋒利都應早已生鏽啦。
哈，原來我錯，佢不單冇生鏽，反之仍可大晒修長美腿，拍動作戲，眼神出手皆極凌厲！邊個？正是莎朗史東。
任何資深影迷，必定不會忘記1992年（三十三年前了）的《本能》。此片震驚國際，只因一個鏡頭，就此殺盡全球票房，人人湧入戲院先睹為快。
乜鏡頭有如此大魔力？正是女主角莎朗史東穿著白色全身短裙，在鏡頭前，突然玩交叉腳，驚鴻一閃，就在這十分一秒畫面中，露出原來佢下身真空上陣。這個鏡頭，事後解釋為莎朗被導演「欺騙」，指白色內褲反光，要求除下，莎朗竟然「願意」！
係真唔係真？娛樂新聞「信二成」啦。
講返三十四年後今天，佢突然出山接拍《殺神Nobody 2》，明星即係明星，嚴格講，已接近阿婆歲數，但一亮相，即顯出迷人吸力。最過癮，佢扮演無堅不摧女魔頭，整個造型，遠遠將戲中所有演員比下去，包括男主角卜奧登科克。
《殺神Nobody 2》嚴格講，只是荷里活B級片，但勝在爽快過癮，中佬卜奧62歲了，外形乃美國隨街見的中佬阿叔，毫無明星風采魅力，但正正如此，Fit晒落劇中看似尋常住家男人的角色。
如此年紀，難得打起來出手乾淨俐落，半點老態都冇，聽講開拍前操\u5497兩年體能。
《殺神Nobody 2》橋段毫不新鮮，一個本來想變回住家男人的「殺人機器」，誤打誤撞逼得重出江湖，將壞人殺個片甲不留，屍橫遍野。好玩在所有血腥場面皆不恐怖，反之詼諧包裝，有啖笑，這個，武術設計應記大功。大熱天時花少少錢過癮個半小時，值！
