新春與馬迷老友聚首，最有興趣討論的，當然不再是騎師潘頓破紀錄，而是講完又講的一場「可疑賽事」，第三八四場次。
呢場妹妹仔黃寶妮贏「會長之寶」，唔算奇，一千米短途減十磅，著數晒。賠率早有顯示，正是由上場的七十三倍跌到閘前的幾倍，雖則開閘前升上十二倍，仍是大幅變熱。
好睇在呢場韋達出三隻，皆一千米馬，搞到資深馬迷個個會心微笑，因班德禮騎「不可擋」，出閘已大力向左望，望乜？正是望同廄的「會長之寶」 邊、出閘是否暢順。發覺掂！舒服晒，一邊放，一邊讓出內檔空位比妮妹，中途曾有點肉緊，故左手作出「上啦上啦」咁款動作，大眾怎不懷疑呢場有晒「劇本」呢？
之後競賽小組循例問話，班德禮循例解釋，疑點利益歸於被告，冇事。
其實大家心照，馬會由上而下，皆在「保護」黃寶妮成長，總之凡佢出賽，附近的馬必會就住就住，以免撞到佢。不止，遇 某 短途場次，若妮妹隻馬又抽到內檔，兼可以放頭又「有」的，一眾華洋師兄大哥就會識做，先唔逼佢，繼而入直路也暗暗擺出個護航陣，更可能臨尾大嗌打氣——Britney Run， Come On，Run！
大家想印證我的講法，易，重溫佢八次勝出的模式，就必會心微笑。
冇人會對這情況過分嚴苛，因大家都想見到香港有位可愛的年輕女騎師站穩腳，這對整個馬圈形象及吸引力有大幫助。
今晚研究第四場二班1650米，應是「智取神駒」與「港林福將」之爭。前者上場打到大熱，原來馬房玩移形換影，布文替廄侶「喜蓮勇感」 飛。今次應該倒轉玩 ，否則馬主余伯拉倉都似，一於做膽！
