養寵物與養BB皆一樣，真係要日日祈禱加阿彌陀佛，千祈咪病。因為成年人病，自己會照顧自己，但寵物及BB又細又弱，真係擔心死。不過，既然是責任，就要 ！
家中小狗哈女，一向活潑冇大病，間中小問題也會一兩日冇事，回復精靈跳蹦。
不過，三日前突然不停怪怪地呻吟，間中又用肚拖地行，然後久不久嘔出白沫。咁情況，當然全家大細擔心死。本希望佢以天然免疫力抵抗，但一日如是，兩日如是，當然要睇獸醫。
去第一間，似妹妹仔的醫生指：「要照照X光，睇睇腸胃之內有乜，才可診斷，看看是否要做手術！」
X光完畢，醫生話腸內有兩個影，X光無法判定係乜。「為安全，我寫紙畀你到設備齊全的中心，做個急症CT Scan啦，好唔好？」
邊有得話唔好？第一階段，先找數一千一百幾元。
速速抱哈女到附近「高級獸醫中心」。醫生初步診斷，先比心理準備：「建議CT Scan之外，再驗血睇色素及肝腎功能，連麻醉及醫生費等，需要約一萬二千元，做唔做呢？」
我望望老婆大人，老婆大人望望我，又係，邊有得話唔做？吸啖氣——做！
坐在候診大堂等呀等，冷氣凍到飛起，又唔知哈女其實乜事，真真但願我嘔唔係佢嘔。
終於診症室門打開，護士請入。
鬼佬醫生解釋得非常詳細：「發現唔到乜 大問題，冇發現腸胃之內有何異物。故此，先打止嘔針，再配發炎藥物。另外，短期建議改食防止胃氣脹的軟料狗糧，再觀察！」
狗糧足夠食四日，盛惠三百一十元。另外「養和醫院」式各類醫療收費，一萬二千元。
即用 一萬三千幾元替哈女止嘔。人？求求其其隊「喇叭牌」或保濟丸可能已經掂！
