曾智華
踏入12月中，馬迷全季最興奮的日子降臨，正是「國際騎師錦標賽」及「香港國際賽事」接踵舉行，天王騎師雲集香港，單單欣賞騎技已樂不可支。
今晚十二位高手率先登場較量。論騎功，當然世界第一高手麥道朗卡士高晒；論對快活谷跑道的掌握，則無人夠潘頓及莫雷拉鍊。
不過，以上三大巨星的馬，唔慌好分，勝出騎師王也不會有高賠率。
執筆時，未知騎師王賠率，但唔使理，小弟一於繼續堅持——一注獨贏巴米高。
呢位法國冠軍騎師，賠率點都唔會太熱（\u5569？），值博率應遠比上述三大騎師高。故此，我只集中研究米高仔今晚坐騎。
一、第四場跑1000米。「縱橫大兄」執靚位，排四檔，呢隻3歲馬今季才上陣，兩次皆跑沙田1000米，分別入P及第四，早早顯露短途實力。今番改跑快活谷，只要轉彎順暢，坐位望贏。
二、第五場「凝妙星」。呢匹乃米高仔全晚最穩的W膽，出賽四次，兩次第四，一次入Q，皆跑快活谷1650米。上次潘頓騎，熱到\u712b手，獨贏賠率兩倍，「軟硬鞭」使出軟鞭，跑第八，有乜原因？老友，你睇\u5413呢場邊個W就知啦，正是佢大佬「哈囉文」爆大冷，二十六倍，真真當競賽小組班友豬頭炳咁玩。好啦，今次再唔現真身，博拉咩，重錘WP！
三、第七場「大學生」，排位麻麻，九檔，但勝在1650米為其專注強項，上季贏一次，由高手布文執韁。之後減分，今場可有P。
四、第八場「巴基之勝」，跑1200米，七檔，機會不算大，因從來只跑沙田，但1200米為其強項，已一W兩Q。今次跑快活谷，有入P機會，剛轉5歲，仍有上升空間。
今晚，「凝妙星」WP，另四隻P過關。
