曾智華
追求心目中王子公主，有N咁多種方法，大家上網查又得，睇愛情電影又得。
絕浪漫的，可以送花（一朵也可），送朱古力、貝殼、沙或葉。沙或葉？真定假？小弟親眼目睹！早年留學美國夏威夷，正正見到同房同學，除晚晚寫情信外，信內永遠附上一個威基基海灘的小貝殼或一小撮沙，兩皆不用消費，但呢\u5572千里送的小物品，足以電暈女朋友。
另外，舊同學分享，原來上世紀七十年代留學加拿大多倫多的，信中附上一塊紅色楓葉，也有相同效果。楓葉，在當地滿街滿地，隨手就可撿到，但香港難見，加上千里寄到，立時變成濃情蜜意，追女仔，一擊即中。
早前欣賞電影《淺淺歲月》後，認識了片中女主角真人謝淑芬，佢話當年亡夫是以教數學及幫手出貓來獲取芳心，真是追求乜都有。
最近與一位巨星太太閒談，巨星六十年前已紅透半邊天，有學養又靚仔，當然不少美女埋身。讀大學時，早是風頭躉，受盡女同學歡迎。太太好幽默：「論樣貌身材，老老實實，我完全冇得揮！」
咁點呢？太太少女時與巨星同校，而當年巨星乃窮家子，要負起家人的生活費，故此，為多賺錢，返大學之餘（當然間中走堂），更亮相電視做主持，逐個騷錢賺，才勉強夠開支。
如此頻撲，又間歇走堂，點能夠應付功課及考試呢？考試冇人可代，一定要自己出馬，但功課則不同。
太太為攻陷王子，使出一招——代做功課，好讓巨星可以放心四出搵真銀，同時又保住大學學位。這種貼心代做功課追求大法果然奏效，終於獲得愛郎歸。
如今經歷了半世紀甜蜜婚姻，出外時仍手挽手，恩愛異常。小弟聽完，也真覺眼界大開！
