曾智華
近月為食老友圈，都在談論一間奇蹟菜館——志成小館。點解話佢奇蹟？除當不少人呻飲食業好難做、冇得做之時，呢間「志成」，竟可以由半年前拍烏蠅蝕大本，變到如今晚晚爆，擴張租埋下層，加大一倍容客量。
事實，志成的兩位拍檔志哥與成哥，也算膽生毛。因此店位置，之前三個經營者都短期執笠，可能因風水或根本出品唔好，乜理由都可以估，但就是間間做，間間執。
其實有先天原因，此店在二樓，冇電梯，樓梯裝修不倫不類，七彩燈光下，少少似架步，生客點會上去？老人家坐輪椅者也不能到。另外門口雙黃線，唔停得車。
種種不利因素下，點解志哥及成哥敢博？第一當然租平，因業主都畀人Cut租約Cut到心淡。第二，上手剩下廚房樓面裝修，仍可用，開張時可慳大筆。
結果，慘情！雖然「志成」」兩人對自己出品信心滿滿，但就是無客，兩個月蝕幾十萬元，腳都軟。不過\u22ef\u22ef不過乜？不過志哥廚功在香港的確頂級。小弟在朋友介紹下一試，哇，出品咁正，冇理由唔得。於是又一\u67b1\u67b1老友帶去，再包下全店，搞三次為食大餐，人人食完豎手指公，咁就一傳十、十傳百，輾轉介紹之下，誇張，搞到我訂房晚飯，都要提早一個月。
我有冇誇張？你試試佢\u54cb豉油王鵝腸、黃金炸魚皮、膏蟹蒸肉餅及手淋炸子雞，就知彈離一般市面對手幾遠。
半年企穩賺下不少利潤，「志成」開展下一步了，召回在大阪四季酒店工作的前廚房兄弟，專攻高檔點心，看可否再下一城。
高檔，當然用靚料，不會是連鎖酒樓集團的水平及收費。「志成」已做出等於「優質」這招牌，絕不會製造普通質素出品\u35ce。
