長假期與幾圍親朋戚友輪番相聚，有話題揮之不去，就是美國總統特朗普搞起的關稅風雲。
「喂大佬，依家仲有乜好撈？天下大亂啦。」年屆退休又未夠鐘的中環大叔，預警美國下一回合必玩金融戰，到時輪到維多利亞港烏雲密布。「你 香港人仲有大把景，我個女 跨境電商打工，舊年升職加薪，以為好好景，點知佢老細對特朗普投晒降，事先張揚，市場再係咁飄忽，好難唔裁員。」
Oh，so sad。大灣區老友補充︰「阿女老細手頭定單係舊年做落，今年去美國大單未開齋。」我唔擔心世侄女被裁，反而關心佢老細，雖然大家素未謀面，不過，聽得佢讚得老細多，例如唔刻薄員工，以同理心管理團隊，絕不鼓勵996（朝9晚9，周末不休），自己準時收工，更關心屬下有否足夠時間照顧囝囝囡囡，這位老細疫情之後勇於進取，生意越做越大，唯一敗筆係太過偏重美國市場。
「你最好請教陳百祥咯。」中環大叔話叻哥未入電視圈是從商，曾去過中東沙漠傾銷雨褸。「唔使你講啦，果位老細好有眼界，見到美國總統日日好似主持綜藝節目咁令人驚喜，已經轉戰中東市場。」仲有歐洲市場，「事關睇個勢，歐美遲早同美國『擘網巾』，轉移市場，中國乃熱門首選。」
我聽落呢位老細唔簡單，問一句︰「佢幾大年紀？」「二十幾歲咯。」「我唔係問你個女，問佢老細呀。」「咪係未夠三十囉。」「乜你唔知，依家內地年輕人都好本事咩？創業家最緊要後生呀！」聽罷，我放心了，對中國更加有信心。
