遊貴州，每朝出發前，必定被導遊提醒：「各位早晨，唔該大家一齊玩\u5413手機先！」入到內地，導遊第一時間收晒全團人回鄉證，因次次Check In酒店要用，之外，佢話最驚團友遺失證件，若如此，肯定煩到人都癲，故此全部由佢保管最安全。但手機唔得，個個客自己要用，而內\u88cf也有不少私癮與證件，包括高鐵票。所以，為免大家出發時遺留手機，故才天天要求大家開車前「玩手機」呢招。
證件、手機、藥物，小弟當然緊張（錢反而冇問題，因老友大把），但其他就好易疏忽。此程帶同大大本的日記簿去，因一邊旅遊，一邊辦公，安排下半年活動。日記簿黑色，咁就弊，某日Check Out酒店，冇為意，漏低\u5497，去到一百公里外的下個城市才發現。點搞呢？呢本日記簿對我好重要喎，立時如熱鍋上的螞蟻，唯有向內地通「班長和」求救。
我就擔心到震，但和哥呢，笑笑口胸有成竹回應：「碌Sir，放心，你本珍貴日記簿，半日內會再出現，包在我身上。」
佢首先用手機Call酒店禮賓部，確認執房員工發現日記簿，然後用手機篤篤篤，通知快遞公司去酒店領取，送回畀我。
講都唔信，由落單開始，十小時內日記簿已經到手，物歸原主。老友，一百公里咁遠，呢種「中國速度」真係只此一家，難以想像其他城市能做到同樣服務。更離奇，只收十五蚊人仔！各位，有邊個可以解釋畀小弟聽，快遞公司究竟賺乜？指派一個速遞員，先到酒店取貨，再安排一百公里送運，人、車、油、路費\u22ef\u22ef加埋收十五蚊人仔？呢種平得驚人的服務，一旦殺入香港，慘，又唔知淘汰幾多人了。
