上周日小弟又馬神上身，聲明「星際快車」可 低全日巨熱「舉步生風」，結果又中，但噴到一地血！因「星際快車」賠率原本超過二十倍，點知跑完才知被打劫，變六倍，頂佢頭槌！必須再提大家，凡「軟硬鞭」騎某些馬房大熱，咪買，班友狼到冇人性 ！
好，今日先講另一場「醫學院大賽」，第三間醫學院成立權，展開競逐。
至今擺明出戰的有科技大學、理工大學及浸會大學。
呢場大賽，小弟化身馬評家，睇睇各參賽「馬」實力，未出閘已勝負分明，根本冇得跑。
申辦成立第三間醫學院大學，政府要求必須過十關，包括：一、創新策略定位；二、實施計劃；三、校園與教學設施；四、臨床經驗與學習資源；五、課程結構與評估方法；六、教學與學習質素；七、收生安排；八、教職員人手；九、資金及財政規劃；十、研究工作。
以上十項，重唔重要？當然重要。但一如跑大賽，邊個做練馬師及騎師更重要，級數不同，賽果就會不同！
呢場大賽，我大大聲預測（應該中硬！）科大Sure Win，因未入閘已見隻馬Fit到爆，而策騎的正是天下第一高手，咁邊有得跑？
老友，單睇個陣勢，當理大及浸大乜都未公布，科大已擺出鑽石陣容，校董會顧問小組，由香港醫學界的大大大佬梁智鴻教授領軍，佢曾經出任醫管局主席、行政會議成員、醫學會會長，更是大紫荊勳賢，冇十拿九穩，點會應承？未夠未夠，小組其他成員，更有諾貝爾化學獎得主Roger Kornberg、哥倫比亞大學教授何大一 呢個陣容，真係唔贏就扑我個頭。
今晚玩泥沙，三班千二米正路依次「包裝百樂」、「哈羅威」、「德心知遇」，冷門加埋貝知仁由頭「隊」到尾的「奮鬥心」！
