過去一周，全城皆在講《破．地獄》，作為影癡，我當然第一時間飛身入場。
嘩嘩嘩，從未見過咁誇張，大家都知，上周六開始，所有影院已排到密麻麻播映，但我睇的一場，在平日早上，竟然仍爆滿。小弟慣性到臨開場時才買飛的，一睇個座位表，不禁講聲：「唔係 ， 人邊度湧出 ？」
此片事先宣傳策略，可以做碩士課程專題研究，因真正做到鋪天蓋地水銀滲透，製造出無限期望，令人萬分期待，加上黃子華及許冠文的吸引力，怎不個個有燃燒欲望先睹為快？
不過，未睇前，也有個疑問：「喂，聲勢搞到如此浩大，將人人的期望推到咁高，一旦有任何落差，會有狂大反效果 。」
結果？整體成績比期望更高！整整兩小時多，全院無一個觀眾中途離場，甚至去洗手間，此乃奇景也。因長者場，當然大部分上年紀，正常現象，一係半小時後已有人離座， 哦哦：「老婆，唔睇喇，去飲茶咾！」又或年紀大，自然膀胱前列腺有問題，點頂兩小時？呢呢，《破．地獄》就能做到吸住你，恐怕一行開就損失欣賞任何精彩場面的機會。
很久未有本土電影去到呢個水平了，就算《九龍城寨之圍城》或《毒舌大狀》都無法做到。
咁多人睇過，再講劇情已無意義。只想講講，此片的幕後靈魂人物，身兼導演、編劇及監製的陳茂賢，技法真的令人眼前一亮，觀眾必定充滿代入感，而每一場戲，皆不長不短，恰到好處。
導演其中一項任務，是引導演員入戲，交出最高水準的演技，陳茂賢百分百做到了。
一邊睇，一邊覺得，下屆金像獎最佳影片、最佳導演、最佳編劇、最佳 已誕生（明天續）。
