香港雖然話係華洋雜處，事事包容，但到底大家仍有感覺，是有分別的。
我不知聽過幾多馬圈內人話鬼佬乜乜、鬼佬物物，意即潛意識「不是自己人」。
香港練馬師圈，有七條過江龍，包括希斯、廖康銘、賀賢、韋達、蔡約翰、游達榮及黎昭昇，另兩位是土生土長的「鬼佬」，應不算是外人，即告東尼及方嘉柏，其他十三位乃百分百華人本地薑。
一直以來，練馬師榜中，土生土長族絕不失禮，幾位更曾奪冠軍練馬師，真刀真槍贏，絕冇半點符碌，香港土砲在這方面有驕人成就。
騎師又如何？一直以來，馬主重洋輕華，好馬畀晒過江龍，加上個別騎功高的巨星（以前的韋達，今天的潘頓）會主動撬潛質優厚的馬，故此著數晒。跑馬不是跑人，咁多超級馬由潘頓獨家處理，怎不令佢一人坐大？
幸而香港有過千隻馬，「軟硬鞭」點都無法掃晒。
其實有目共睹，只要有好馬在手，華將，尤其是今屆的華將，絕對可以交出亮麗成績。
不知今時今日仍有多少馬主純崇洋，但以小弟來講，若我旗下有馬，一定寧願畀何澤堯、梁家俊、蔡明紹及潘明輝。事實勝於雄辯，今季以上幾位表現，絕對可以揮低潘頓（無法，佢霸住所有靚馬）以外的過江龍！洋騎師賀銘年、湯普新及董明朗，以香港水平衡量，實在唔多夠班也。
希望各華將繼續努力提升策騎境界，可能終有一日，「軟硬鞭」要變阿二或提早退休！
今晚快活谷第四場跑一千米，最好笑有隻「大番薯」，唔知佢馬主係咪整蠱自己？
呢場必有人繼續追黎昭昇贏馬，「極光彗星」由潘頓騎抽好位，咪搞我！小弟估「銀刺勇士」W！
