馬季之中，有幾日馬迷好易搞亂，因突然改跑周六，呢呢，今日正是，因傳統「樂聲盃日」排在星期六。
呢日信興集團必早早Book定沙田馬場最大的「玻璃屋」，宴請全城政商及學界名人，齊齊一邊跑馬，一邊回顧集團對香港的貢獻，之外，當然人人享受一頓極豐富自助餐 未夠未夠，資深客人（即屆屆都來的）更會留肚食咖喱。
供應靚咖喱乃信興創辦人蒙民偉先生在生時吸引嘉賓絕招，因佢廚技極出色，尤其煮咖喱。
每次「樂聲盃」，會親自炮製幾大煲咖喱運到現場，預先放好，令客人一到，已口水流流食欲大振，個個搶住在樂聲牌電飯煲中，猛裝飯再淋上咖喱。
以上場景，為每年今日獨有的。小弟去過幾次，次次好奇——乜香港有咁多人喜歡食咖喱的嗎？點解平時唔覺的呢？
蒙民偉老先生在世時，訪問過佢，講到初初做推銷員的艱辛，聽見都腳軟兼佩服。佢代理樂聲牌電飯煲，上世紀六十年代，根本冇人信飯煲可以用電。此煲由日本引入，比用柴火更乾淨衛生，兼且飯味並沒失真。為令街坊接受，於是攜同臘腸，到屋 逐戶拍門推銷，即場煲出一煲又一煲香噴噴臘味飯，免費畀大家試。呢種毅力感動不少人，結果樂聲牌電飯煲從此奠下王者地位。
上一代的堅毅，今時今日香港已消失了。
今日跑十場，主角當然是「樂聲盃」，二班馬跑千四米，報名非常踴躍，爆晒棚。但報名時有 特別，不少馬並冇確定騎師，即排位前才臨時拉伕，欠誠意。
剔除以上馬匹，我睇「飛鷹翱翔」、「天天同樂」、「包裝天將」及「球星」最具冠軍相！一於用「球星」做膽！
