不太明白，點解台灣有咁多「盲人按摩」？只要一上網，例如台北，已有數百間，不少屬集團式經營，這現象仿似全球獨有。有冇邊位高人，可以替小弟拆解這個疑團呢？
早期基於好奇，同時也想支持一下傷殘人士自力更生，故求其選一間試試。一般收費為按腳半小時400台幣，加十五分鐘再加200台幣；其他也有頭肩頸及全身，一般講，按腳收費最高。去完一次後，感覺良好，故此每次到台灣，無論東南中北，都會去盲人按摩，每次都是按腳。
上周又到台北，打風，處處關門，但便利店及盲人按摩則照開，如此有工作熱誠，當然要去捧捧場。
住JR東日本大飯店，位在中山區，行五分鐘正有一間「詠泉盲人按摩」。
推門入內，兩位師傅，一肥一瘦，輪到瘦的上鐘，冇問題，照做。
師傅問：「先生，做多久？」未知佢功力，為策安全，答：「三十分鐘。」點解？若唔妥，無謂虐待自己也。
手勢專業，按得舒服，三十分鐘後，立即加多十五分鐘，對方感謝微笑，除多賺外，當然因客人欣賞。
一日後，心思思又去，今次輪到肥師傅。既然上次咁滿意，唔使猶豫，主動提出：「師傅，請做四十五分鐘。」
大劑！竟然出現反差感覺。即係點？即係 肥師傅真係大安旨意，態度鬆散，塗搽完潤膚膏之後，頂佢頭槌，全程只用單手按。我的表情當然極度不滿，可惜佢乃失明人士，就算小弟對眼噴火，佢都睇唔到，全程懶懶閒單手按足四十五分鐘，咁鬼吞卜就賺 我600大元台幣。錢唔係大問題，但佢副低級服務（有咩？）態度，實實在在離譜，我當然唔會同佢理論，因為 氣，今次 聲吞 佢算。
