裕美今天37歲生日，今年她選擇在遊輪碼頭一間cafe舉辦別開生面的《裕美生日毛孩招親日(領養日)》，連續兩日為流浪貓狗尋找溫暖的家。談及近日麥明詩為兒子舉辦百日宴，林作媽王莉妮（Lily）竟意外缺席，疑似避免再捲入是非圈套，裕美暗示作母已跟「無緣份的新抱」麥明詩劃清界線，爆響口說：「Lily姐講過『件事好煩，亦都唔想再煩。』」採訪：娛樂組 攝影：林賓尼
裕美日前專程到天水圍探訪獨立義工Debby夫婦，他們自費租用場地收容14隻流浪貓和7隻狗，當中有剛出生的貓狗BB，裕美除了大讚毛孩好可愛外，最感動畫面，見到有母貓肯充當非親生的貓B奶媽。她表示：「其實每年都有人同我喺酒店搞大型生日派對，做人最緊要做啲有意義嘅嘢，所以今年決定以另類方式慶生。」
捐生日禮金助浪浪
她和獨立義工團隊Debby夫婦，聯手打造宣傳領養平台，緣於當初Debby在垃圾房執到3隻小狗，於是透過IG度DM她尋求協助：「我喺IG拍片呼籲尋家，結果佢哋好快就被成功領養，我開心咗個多星期，有時千金難買呢種快樂及滿足感，不如趁生日搞大件事。」領養日將有30隻待領養動物出席，裕美更親自設計T恤及布袋為浪浪籌款：「我仲會將林作兩萬蚊生日禮物嘅budget捐晒出去救助浪浪，生日願望所有毛孩全部都搵到幸福家庭。」
為唐貓狗平反偏見
談到動物權益，裕美嬲爆繁殖場無視生命的行為，之前拍片怒斥有疑似繁殖狗場，為美觀殘忍剪耳縫合兩個月大黑色都柏文犬，令狗隻細菌感染中病毒離世，令人髮指：「繁殖場將生命當商品，搞到好多名種貓狗天生體弱！」她特別為唐狗唐貓抱不平：「好多人話養唐狗核突、冇錢先養，其實佢哋靚過好多人！唔少有錢老外都會領養。」裕美從小飼養唐狗，大讚牠們既聰明又忠誠：「點解要用價錢衡量生命價值？如果你真係高尚，就唔會覺得其他生命低一等！」她呼籲大眾改變對唐狗和唐貓的偏見：「某些傳統觀念，比如圍村人認為狗仔唔使絕育，結果放任繁殖又不負責任，生落大堆狗BB又冇人理，真係激死我。」她希望大眾要改變膚淺價值觀，並舉例有山頂豪宅大業主，驅趕屋苑內一竇流浪貓，迷信自來貓招厄運，她不屑反擊說：「一個人好運係可以帶祝福畀人，唔係要靠啲乜，唔該檢討一下自己心態。」
提到與林作的相處，裕美突然笑說：「林作真係似我屋企隻狗！成日搞事、要我餵飯、飲醉酒就亂講嘢。」但她認為這就是真愛：「佢成日瀨嘢要我贖返嚟，但我對佢都不離不棄。」這番言論竟獲得林作認同：「佢話我比喻得好貼切！」
尊重問題拒見前度
另外，最近裕美因為獨家向《星島頭條》抨擊林作前度麥明詩風波持續發酵，早前她指控麥明詩「擺林作母親上枱」、「賊喊捉賊」，更質疑對方「為流量講大話」。雖然麥明詩至今未回應「賊喊捉賊」指控，但事件似乎已影響林作母親的決定。近日麥明詩為兒子舉辦百日宴，林作母親意外缺席，疑似避免再捲入是非，和「無緣份的新抱」麥明詩劃清界線。對此，裕美說：「我唔清楚Lily姐點諗，我唔知佢點諗，佢有自己嘅朋友圈及生活，佢只係講過『件事好煩，亦都唔想再煩落去…』(係咪劃清界線好啲？)你問我，我就唔會再同前度嘅屋企人聯絡，尤其對方經已有另一半就更加唔會啦，雖然林作會話『唔介意』，但唔好當人死㗎啦，其實暗地裡係會有唔尊重成份，呢個係尊重問題。」她透露連林作也覺得奇怪：「我同麥明詩都分開7、8年，中間大家都換過幾個伴侶，點解仲要講？」
學歷高並非人品好
對於林作拍片力撐裕美人格，裕美爆出真相：「其實我係冇乜感覺嘅，只係有嗰句講嗰句嚟回應傳媒，唯一有少少忟憎，我不過，自己好忙，林作經已冇乜貢獻，佢屋企嘅嘢仲嚟煩到我！所以佢見我發忟憎就做啲嘢等我收聲。」裕美坦言：「香港真係好多人只係睇學歷及背景，但學歷高唔代表係人品好，讀書未必讀到品格，正如有啲無良醫生都會拖症，我點解鍾意小動物多過人，因為佢哋真係好單純，人畀毛孩恐怖，亦係我唔生小朋友嘅原因，尤其我喺呢行咁耐，發覺好多人係會戴住假面具做人，所作所為超越我想像。」
