上周三，被邀往樂富中心主持「世界閱讀日」開幕，早早有公開宣傳，歡迎市民參加。開始前，有位70歲嬸嬸逼埋我身邊，嚴肅問：「碌Sir，我同你WhatsApp通訊半年，為乜你十幾日前block咗我？」我：「姐姐，你等等先，我做完儀式再傾！」
嬸嬸誤墮投資騙局
一完佢又逼埋嚟，將「我」與佢對話截圖展示。咦……真係有個「碌Sir」過去大半年對佢噓寒問暖，又送小心心及溫馨Cutty Sticker問候，並且給予「必勝貼士」投資股票。
各位睇到呢處，相信你已知嬸嬸中正騙徒陷阱，着晒迷啦。
原來嬸嬸有三個仔女，現今不在身邊，可能寂寞，加上手頭有幾十萬現金，諗住「投資致富」（幻想！），碰啱網上有「碌Sir投資貼士」，用正小弟真人相片，咁就死得。於是，嬸嬸即去電「碌Sir」求教。對方見有水魚上釣，立即動用三寸不爛之舌，Sell自己圈中幾咁關係縱橫，凡有IPO都可以優先獲批股票，賺梗。再晒往績幾鬼巴閉，令嬸嬸以為撞正財神，信到十足，晚晚與「碌Sir」用WhatsApp傾心事及徵求投資貼士。
插到「仙股」兼停牌
故事至此，當然騙徒開始收網，介紹買隻「必賺」的仙股。起初一買，果然賺（騙徒做手腳掃高，好易，因根本平時冇成交）。嬸嬸見咁筍，仲唔掟重本？結果，你應該估到啦。隻嘢先插到變仙股，然後公布延遲發2024年業績，再開仲死得，被揭涉內幕交易而被勒令停牌。
嬸嬸的棺材本冇了，但佢丁點也沒怨呢位曾經關心佢多月的「碌Sir」，只是，忽然被block，若有所失，冇晒感情依賴，才走到樂富中心找「真人」問為乜如此忍心，唔再同佢做朋友，不給予投資貼士。
慘！各位，你叫我點救佢呢？事實上，3年前小弟已開始被騙徒借樣行騙（股神、特首、多任財爺、誠哥……無不如是），早早報警備案，但騙徒遠在他鄉，拉無可拉。各位苦主，還請自己醒醒定定學下用「常理」。
資深傳媒人 曾智華
相關文章：勿立美股「危牆」之下︳曾智華
