陳慧琳（Kelly）在踏入樂壇30周年之際，除了宣布7月11日起在紅館舉行8場《陳慧琳Season 2 萬人結界演唱會》外，更特別邀請林家謙及Oscar（李文曦）共同打造感恩單曲《鳴謝你而不想說後悔》，歌名源自Kelly 2002年經典作品《最愛演唱會》的結尾歌詞，由MV合作導演Sheng提出創作概念。
陳慧琳新歌講感恩
Kelly分享：「Sheng好鍾意我嘅歌，拍《談情的價值》時建議可以用《鳴謝你而不想說後悔》創作，佢講完我又覺得幾好喎！佢又不斷鼓勵我要同新生代歌手合作，之前我就同AGA（江海迦），今次就搵咗家謙幫我寫首新歌。」而Kelly和家謙溝通歌曲主題時，湊巧家謙剛想寫一首關於感恩的歌，又有一個demo叫《Gratitude》，並向Kelly推薦了填詞人Oscar，三人一拍即合，當中Oscar的歌詞「皮囊中凋謝，靈魂不凋謝」更是Kelly大愛：「雖然皮囊會凋謝，但靈魂會長存，我想用呢首歌嚟鳴謝同陪伴我嘅歌迷！」新歌唱腔亦大不同，Kelly說：「呢首歌唔可以企喺度唱，要喺空中飄住咁唱，配合歌詞，又唔可以唱到好sweet或者好sad，需要用好輕好輕嘅聲線去唱，所以我就諗不如把聲係好似to be continued待續感覺，聲線要好溫柔，好似喺星空上面唱歌。」她更大讚家謙才華，直言一聽demo覺得已經可以推出。
這次MV故事圍繞歌手與歌迷間相互扶持的故事，Kelly做回陳慧琳角色，戲份較少，同時找來龔慈恩、廖子妤（Fish）等實力派演員演出，家謙則客串一個歌手角色，Kelly介紹說：「Fish飾演我嘅歌迷，細細個已經好鍾意我，會寫信講佢嘅難題，我又會回信鼓勵同幫手解決。Fish嘅角色長大後，爸爸過身，事業上又遇到難題，於是寫咗封信畀我，我又回覆佢，就係呢種與歌迷嘅互動。」
相關文章︰Chill Club頒獎禮2025｜Kelly請硬AL做7月演唱會嘉賓 有興趣與MIRROR、COLLAR出合唱歌 囝囝已長大唔鍾意阿媽單獨陪伴
廖子妤中學迷上陳慧琳
家謙、Fish則激讚Kelly外表完全沒變，兩人都被她的性格吸引，家謙說：「合作前感覺Kelly比較神秘，比較少出嚟，但當佢出現又會嘩一聲，覺得佢冇變過。同Kelly合作覺得佢好平易近人，講效率，做嘢唔會轉彎抹角。」Fish就大感榮幸：「認識Kelly係由我中學時期開始，呢個MV有我嘅細個版，正正就係我嗰個年代睇《薰衣草》，特別留意到咁靚女嘅角色。我細個唔算聽得多Kelly廣東歌，因為中學時台灣音樂盛行，當時我係聽Kelly嘅國語歌，好鍾意《再見北極雪》，同周傳雄合作嘅歌《記事本》，都有陪伴我青少年時期。」
