自由市場基本上是公平的。例如買賣，只要供求是自由的，你嫌貴可以唔買，同理，貨主嫌人出手低，也可以唔賣，一切按市場形勢而定價。
如今寫字樓及商舖價錢已跌到嗌阿媽，仍然未停，即自由市場運作正常也。
勞工市場也如是。經常聽見僱主話難請人，係真唔係真？當然真！原因？其實係佢在搶人中輸蝕。點解輸？講穿了，其實大部分生意人皆不想出高價搶人，反之希望越平越好，明明人 值十蚊，若佢出九蚊請到，就會沾沾自喜，覺得著數晒。不過，你精我唔笨，一名打工仔，若明明知道自己市值，當然反希望收到十一蚊啦。九蚊？咁明日有人出十蚊，你就咪怪我立即失蹤喇。
薪酬，當然是重要一環，其他又如何？就小弟所見，成功的機構，一定有幾大誘因，令員工長做而無意思遷。對，薪酬重要，但並非一切，其他的加加埋埋，可能比人工更重要，例如工作環境、晉陞制度、管理質素、公司品牌、設備配合、福利保障、員工增值
昨日與幾位名醫晚飯，講到點解香港醫院界，永遠係某大私家醫院做一哥，其他做極都埋唔到佢身呢？事實，大量經典名醫，七十、八十歲仍日日在此行醫（服務？），當中四大原因：一、薪酬絕對不低過任何醫院。二、設備儀器全港最佳，且永遠在改善更新中，令醫護在治理病人方面，更得心應手。三、所有部門齊備，就似一所公立醫院（當然人手充足方面大大彈離）。任何病人有需要，即可成個團隊組合出現。四、最重要，醫護人員睇病住院施手術，全部免費，完全無後顧之憂，令員工百分百安心。這四大原因就將所有員工「綁死」 。
