美國經濟數據持續放緩，市場再度憂慮經濟逐步進入衰退，同時通脹壓力猶在，滯脹恐慌令美股持續下挫。
回顧近代美國經濟興衰循環，甚少出現非金融危機引發嘅經濟衰退，對上一次已經係2001年，當年美股熊市長達兩年以上，原因係經濟失去長期增長動力，減息都冇用，情況比金融危機產生嘅熊市更漫長及痛苦。
當美股每次面對衰退憂慮而下跌，開盲盒嘅話，最後出現衰退嘅機會率，其實兩成都冇。
上次花一年確認避過衰退
往績顯示衰退低機率出現，係咪代表我哋毋須擔心美股出現熊市？又不一定，2018年下半年以及2022年熊市，為期分別不足半年及一年，其中2022年需要足足一年時間先確認到經濟避過衰退，然而確認需時越長，衰退預期更容易產生，於是最後即使原來冇衰退過，但股市跌咗先，先將壞嘅一面反映出來。
美國經濟增長放緩同衰退，基本上難以分辨，最重要係睇實就業數據，每次經濟衰退都會伴隨失業率短期爆升嘅現象。而上周五公布嘅就業數據，非農數據冇大跌，失業率由4.01%升至4.14%，數據唔理想，但未到快速進入衰退嘅程度。
觀望就業數據、關稅影響
所以，市場要判斷衰退與否，仲需要時間。理論上，數據越快確認衰退冇出現，對美股越利好。然而，快極都要等到下月就業數據，稍後仲要觀察連環關稅影響，即使美股展開短期反彈，未來仲會進入反覆格局，未必好似舊年8月一樣，能夠快速解困。舊年8月美股之所以快速走出衰退陰霾，原因係經濟數據好快話畀我哋知衰退並不存在。
即使我哋有信心衰退冇出現，美股中短期強弱，都要視乎我哋用幾多時間去確認不衰退，其間美股動盪市況仍可能持續。
晉佳
https://www.patreon.com/user?u=28525578
相關文章：
