(曾智華)
香港電影院商最流行搞「一片功成萬片枯」。對，香港是商業世界，行資本主義，但都唔使行到「各位冇得揀，唔食請借歪」\u5413嘛？
我講乜？大家必知，去年上《九龍城寨之圍城》時係咁，幾個月前上《破．地獄》時又係咁，如今呢期上《哪吒之魔童鬧海》也如是，簡直玩「封場」。大佬，使唔使咁呀？
例如我去慣的又一城，有七間戲院，大小皆齊，一上《哪吒2》，其他片一係冇得上，一係每日只三兩場應酬\u5413。
今期慘無人道，最高質素的兩套奪得國際大獎項的《搖滾詩人：未知的傳奇》及《美聲歌后：瑪麗亞》，前者扮卜戴倫的添麥菲查洛美乃天才演員，早已獲得奧斯卡提名，靚仔演技好，後者乃安祖蓮娜祖莉演技「晒冷」之作。
任何人若稱自己為影迷，必搶先入場睇這兩套頂級電影。奈何冇晒癮，我想睇，搵來搵去，又山旮旯戲院，又天地場，千辛萬苦才勉強搵到。喂！套《哪吒2》使唔使霸道成咁呀？
剛剛睇完《美聲歌后》，邊睇銀幕上的安祖蓮娜，邊有無限欷歔，因佢演出的劇中人瑪麗亞，乃一代歌劇界巨星，其獨特而天賦的歌聲，迷倒無數歌迷。只可惜瑪麗亞的真實人生非常坎坷，雖擁天籟之聲，但就在如日方中時失聲。更失落，曾受希臘船王瘋狂追求，但最後對方娶的，竟是甘迺迪總統遺孀積琪蓮。此外，一生在情方面也非常落寞\u22ef\u22ef看著看著，似乎安祖蓮娜一邊演瑪麗亞，一邊在演自己！
我見猶憐是，佢如今已瘦成一棚骨，無論用甚麼豪華衣飾遮掩，到見膊頭手臂手背，已無半\u4e21肉，剩下是條條青筋。
一代美人正在淡淡的Fading Out了，非常無奈，但是現實！
