錯就認，周三賽事，小弟跌晒眼鏡，以為告東尼出十隻，理應大舉出擊，尤其一月盃擺強陣，點知，唉 輸到撻皮，只得一隻「當年情」入第三，最離晒大譜為「軟硬鞭」潘頓隻「瀧澤飛駒」，二點九倍全熱門，竟夠膽死跑第尾，輸十二個半馬位！
馬會為捧潘頓，谷佢破紀錄，刻意整 個鐘在馬場，凡贏佢就敲一下。這個鐘，一個唔覺意，變為不少馬迷的「喪鐘」，因不少人以為老潘為提早破紀錄，會應搏盡搏。
哈哈，點知佢正正可能利用呢種群眾心理，倒轉玩，周三就表演兩隻跑包尾畀你睇，犀利。
不過，馬圈是個多姿多彩世界，有「整蠱專家」，同時又有令人可喜的「龍穿鳳」現狀。
小弟講的，當然是長期冇乜馬騎兼發霉的騎師巫顯東，突然發威，在昔日師傅沈集成關照之下，連贏兩日。
第四場「荷花之星」，更贏得有板有眼，入直路帶離，爆出六十五倍巨冷。
騎師也是表演事業，出場時要講信心，長期輸當然唔掂，會成個謝晒怯晒。信心十足則不同，鬥留放，鬥末段，可以同你死過。
沈集成今年明刀明槍爭冠軍，不少馬谷到火紅火綠，而佢又爆倉，希望多點關照巫顯東，扶助有心發憤的弱家。
其他練馬師，尤其華人的，也望幫幫手，畀多 機會巫仔上陣。
明天賽事，最有研究價值為第七場，因十二匹馬中，有五匹上場勝出，包括：「包裝天將」、「舞林密碼」、「開心寶寶」、「飛輪步」及「玩笑」。我就飛晒佢 ，改買三隻，分別為「競駿輝煌」、「亞機拉」及「球星」，Q、PQ及二重彩。若搵膽就用「球星」啦，此程有保證，檔又好，睇希斯明天個陣，真係唔 少 老友。
