「冇人會理是否由你而起，也冇人研究關唔關你事，總之你坐得呢個位，就關你事，要 飛，要問責！」
N年前加入政府，在會議中，現場聽到最高上司訓斥某中層管理人，因後者意圖解釋一項錯失，是由其他下屬引起，佢根本唔知，結果當眾被省到面懵懵。當時我剛剛加入官場，上司所言一生一世銘記於心，亦深明此乃問責的精神——坐得個位，就唔關你事都變關你事！
剛又想起呢幕，因上月珠海發生車輛衝向人群大災難，三十五人死，四十三人傷。衝向人群司機可能是刻意，也可能是失控，更可能是精神有問題，原因未見公布，也暫未上庭審訊。但無論如何，市長黃志豪已「被辭職」，公安局局長謝仁思則被炒魷。
佢兩個能否預知有人會製造慘劇？你估神仙咩！但現代問責精神，正是「關唔關你事都關你事」，請你落台。
多年前的官場較寬容，做乜職位，都會有「蜜月期」，讓你先學習、適應，然後慢慢進入角色。
今天又如何？「蜜月期」乜 ？慢慢適應？發夢冇咁早，唔該立即 ！
你睇陳美寶——今日任命局長，翌日就要上立法局接受質詢，冇人等你「適應」。
羅淑佩也如是，做開房屋署署長及常秘，一轉位再加升職主理文化體育及旅遊，鬼畀時間過渡、適應、學習，唔該立即搞掂個郵輪碼頭、啟德體育園及展開賽馬旅遊研究！
羅淑佩著名「勁好打得」及喜歡迎難而上，上場一日走N轉——神采飛揚先去完體院運動，轉個身已由運動裝變宴會裝，入馬場參觀國際大賽，之外，更去埋啟德體育園視察排演人流及交通疏散，相比之前為局長，真係 唉！
