(曾智華)
《爸爸》今日上畫，真真令人擔心。
擔心乜？因過去幾星期，香港戲院界出現一個令人非常無奈現象——一片功成萬片枯。
即係一套《破．地獄》超級狂收，自然在商言商，院商將一切場次盡畀《破．地獄》，其他全部靠邊站。就算幾有誠意及幾認真的製作，甚至可能也有票房潛質的，皆冇運行。
最弊見到早前有些院線，全院由日到夜，半套都唔畀機會其他片，現象極度不健康。
今日又有套高質素電影要上了，正是《第21屆香港亞洲電影節》的閉幕電影《爸爸》。
執筆時翻開各大院線點排《爸爸》，哎 ，都咪話唔慘情，例如又一城院線，只有三場，而《破．地獄》則仍然有五場。
荷里活戲院更離晒大譜，一場都冇！而《破．地獄》放二十場。大佬呀，使唔使咁玩法？畀條生路行 都得 ？唉
小弟上周因想盡綿力支持誠意本土製作，包場組織七十幾位老友，到高先戲院睇《爸爸》，之後邀得導演翁子光、女主角谷祖琳及飾演女兒的熊諾頤作現場分享。
肯定此片又將再為劉青雲帶來下屆金像獎提名機會，佢演技永遠有種內斂爆炸力，忍住忍住，但觀眾就是感受到佢心中的火燄。
「導演，你選男主角，有冇考慮其他人選呢？」
「冇！因青雲不單演技好，而我 做過調查，佢特別受女性觀眾歡迎！」翁子光解釋。
劉青雲受家庭婦女歡迎，因佢有種安全感Feel，形象又夠草根親民，兼且太太郭藹明也極有觀眾緣，兩人就似與香港人是一家。
《爸爸》不是商業電影，但極好看，尤其當你家人或朋友中有嚴重情緒病患者，更會邊睇邊沉思。
