賽馬很好玩，好玩在你永遠唔知下一步開乜！既然唔知，就會有一種興奮的期待感。
當然，「開呀」之後，你可能會歡喜若狂，也可能會無限沮喪，但冇問題，兩種感覺都很「過癮」。
周三馬神發威，一棍藕落我個頭！因當日在本欄牙擦擦，話自己衰鬼大翻身，上周日貼士中到開巷，點知 一啖沙糖一啖Z，周三立即貼士食白果，打回原形變燈神，死未！
周三小弟被打回原形 ，但卻有一位老牌練馬師突然揭竿而起 ，正是告東尼。
告仔在周三前，練馬師榜名列第九，中游，以佢名氣咁大，冇理由如此，加上上周日輸 隻馬王「加州星球」，立即被多口佬揶揄佢練馬方法有點老化，搞到馬王跑成一箸菜咁，毫無競爭力，應早退休。
哈，話音未完，告仔卻突然周三晚似變魔術，出六場，掃下四W六Q，全部冇東廄馬冇錢收，令全場O嘴。
更令佢足以串串貢，為四W皆冇用潘頓、麥道朗或布文呢類高手，只用自己徒弟仔蔡明紹及鍾易禮，再加一個中游騎師艾道拿，就咁已橫掃快活谷，點到你唔服？更甚，四場W有三場爆冷，兩隻為三十四倍及二十六倍，簡直神乎奇技，你班友話佢「廉頗老矣」？
同一晚，新晉巨星游達榮全面啞火，兩隻新勝馬「焦點」及「競駿皇者」再出走晒樣。呢點，大家必須存記。
明天舉行老牌盃賽「其士盃」，睇牌面應是新勝猶勇大幅加分的「堅又威」及「遨遊武士」擺擂台。
但我會扒冷，呢輪告仔咁旺，一於買佢明天再出魔法，將「亞機拉」推到高峰。此馬在沙田跑過一次千六米，即入Q，經過半年再突然報此程，告仔必有見地，我投一票。
