錯就認，打就企定，最近幾次本欄貼士皆屬山埃，服用者全部屍橫遍野，故此，小弟被大批中招者揶揄為「燈神」，樂於接受。
不過阿Q點，可倒轉睇，凡我貼的就飛（多是熱門或半熱門），也可以慳返幾注 ！
周三快活谷賽事頗多話題，第一當然是遇上颱風，賽事中途腰斬，各大彩池，尤其騎師王及練馬師王點處理，似搞到有 「一鑊泡」，馬迷嘈到拆天，不無道理。
第二，小弟貼的第四場，出現驚人神秘力量未卜先知。開閘前竟夠膽掟幾百萬元，將「知道長勝」由獨贏賠率十二倍打到落三倍，食到應，肥過豬頭。哈，究竟神秘力量是何方神聖，可以精準到咁的呢？
一眾馬迷當然想知，怕且馬會保安部更想知。因成個彩池畀單一勢力抬起，若成慣性，仲得了？唔該火速查查狂落注又命中者是何方人馬，一定有紀錄 ！
同場有匹「問題馬」，為跑包尾的「囍眼光」，真係由頭到尾都冇乜認真參與競賽，尤其入到直路，騎師艾道拿更明明有空位唔搶上，反「隊」落其他馬屁股，結果只輸三個馬位，「表演出色」！大家存記此馬！小弟貼的「銀刺勇士」也完全冇 睇，眼冤！
明天沙田精彩賽事上演，總獎金五百三十五萬元的二級賽「短途錦標」，跑平磅，好難爆個石破天驚。
必然之選當然是最高分，從未在此程甩WP的「加州星球」，但到底已六歲，遇上如日方中的四歲後起巨星「嘉應高昇」，將會如何，萬眾矚目，因後者此程七W兩P全入Q！
呢場我會二重彩、單T及四連環，用五隻串勻。以上兩匹外，另加「嫡愛心」、「驕陽明駒」及「美麗第一」。「驕陽明駒」此程紀錄極犀利，但試閘跑包尾，似在示人以弱！
