N年前加入政府，上司已灌輸「公務員大法」，正是事事要緊跟政府立場——line to take，千祈咪多事自作主張，叫你行左你行右，是死罪。
對，年輕人一定個心唔舒服：「喂，擺明行左錯晒撼頭埋牆喎，照去？」
官場現實情況，掌權上司叫你「撼」就「撼」，因佢應該有另一層次的考慮，你根本唔識又唔明，何況佢大權過你，使乜你多事。
不過，經驗告訴大家，政府由「人」組成，「人」的決定，總有對有錯，這是正常的。
但政府高層的心態思維——不能認錯，因一認錯，極易兵敗如山倒。尤其你認得一次錯，外間（乜人都可能）就會逼你認第二三四次，如此，威信何在？
香港歷屆政府，多年來不知作出多少錯誤決定（當然對的也不少，兜住先，哈哈），要接手者去補鑊。但政府就是政府，要畀人有延續性感覺，不可似商業世界，上手CEO做 ，一概唔關佢事，兼且盡量將衰 入晒佢數。
政府文化，上手做錯都要頂，就算死頂，頂到個心MM聲都要。
隨便舉例，歷屆政府下錯的決定：一、郵輪碼頭由政府興建、政府管理（結果當然是政府蝕，蝕到眼都癱兼變大白象）；二、「孫九招」將土地供應及居屋煞停，搞到供求火速失衡，樓價爆上天咁高，整個經濟亂晒，大傷元氣，執手尾執到氣咳；三、林鄭將兩蚊雞搭車降到六十歲，無限量加大政府負擔，今屆立即見到個黑洞出現。下決定者已經關人個關；四、冇人再用的「明日大嶼」形容，至今變為再做就是「明日大愚」，但仍要做，倒錢入海。
以上四樣政策，今屆政府敢唔敢話全部錯到離奇呢？當然唔敢亦唔會。咁點？諗方法一係拖一係卸囉，都幾考政治智慧 。
