女團COLLAR成員Sumling李芯駖及Marf邱彥筒，昨日同時各自推出新歌。Marf邱彥筒推出年度第二首個人單曲《心好細 <3》，歌曲一改以往跳唱風格，旋律偏慢，是Marf出道以來首支慢歌。而芯駖則繼早前推出《SPYLING》後，再推出本年度第二首個人單曲《讓思憶症發作》MV。
Marf新歌《心好細 <3》內容道出她心底裡的不快及自身問題，為迎合歌曲內容，今次MV比較「戲味濃」，因此Marf特意邀請劇集《那年盛夏我們綻放如花》的好拍檔George歐鎮灝擔任MV男主角，在熒幕「再續前緣」。
歌曲《心好細 <3》由馮允謙編曲、周耀輝填詞，是一首已籌備兩年的作品，Marf指：「呢首係自己第一首慢歌，係好Personal嘅作品，亦係一首幾唔開心嘅歌，我同周耀輝老師錄咗一個長達9分鐘嘅錄音，入面有好多好混亂嘅情緒，佢幫我整合番，寫咗呢首歌，所以我好喜歡歌詞。」作為出道後首支慢歌，Marf表示在演繹上有點緊張：「呢首歌喺曲風上係我好鍾意嘅嘢，不過我有啲緊張，因為聲音嘅考量多咗，其實我幾喜歡唱呢種節奏，如果係跳舞嘅話，一定係快歌好玩啲。」
芯駖獲Stanley伴舞力「撐」
而芯駖本年度第二首個人單曲《讓思憶症發作》MV，今次歌曲旋律輕慢，且帶有詩意，以回憶為題，道出一段看不見的關係，今次MV芯駖更找來入行前的跳舞伙伴Stanley邱士縉，客串大跳雙人舞展現默契，客串的Stanley更表現落力，又瞓地又要「舉」起芯駖，難怪芯駖感激表示：「同佢合作，有非常安心感覺。」
歌曲《讓思憶症發作》製作團隊陣容鼎盛，歌曲由謝芊彤所寫、林若寧填詞、Jason Choi 蔡德才監製及編曲、麥曦茵執導MV，內容講述一段看不見的關係，芯駖說：「今次題材喺入行冇耐已經諗到，事緣有次㩒手機，見到往年嘅今日，睇番以前同朋友嘅一段回憶，但因為某啲事情，已不能再成為朋友，但其實我哋曾經一齊旅行，我有危難時，佢亦幫忙我好多。人生總有啲關係好似看不見，但永遠都有聯繫，所以今次首歌係講一啲睇唔到嘅關係，而呢啲關係係影響深遠。」芯駖續說，今次歌曲無論在錄音或MV拍攝時，感覺都非常揪心：「因為諗番好多回憶，仲諗番好多好多挽回唔到嘅關係，有一種遺憾同可惜喺入面。」
提到MV的難忘部分，芯駖指絕對是跟Stanley的重頭戲——雙人舞蹈，她指：「今次首歌講看不見嘅關係，呢段關係可能係前度，有啲前度可能係鬧交收場，但亦有好sweet嘅畫面，而今次搵Stanley嘅原因，因為佢好配合個角色，佢就係一個好男友嘅image。」
