今日小弟一邊度標題，一邊想笑，點解？因我輩男性老友，十個十個前列腺開始鬆弛，咁會點？正是經歷「少年一支箭，老年一條線」的人體自然發展。
凡入洗手間，就算有尿意都會窒住窒住，未能一氣呵成話出就出，一支箭般射出。
提起窒住窒住，足足成個8月，大量六十歲以上老友猛問：「喂碌Sir，搞乜咁耐都未出 ？」
佢 問乜？正是問過去幾年大概此時，政府開始公布的申請銀債詳情。
今年《財政預算案》，財爺波叔早早講 會發行500億元銀債，自然老友記全部摩拳擦掌準備Sleep On It（ 落去），因全世界冇一樣毫無風險的投資，會有咁筍回報。
不過，小弟點會有答案呢？我又唔係財爺，更唔係金管局總裁余偉文，只有佢 才知幾時開記招、定利率及介紹詳情。
等我亂鬼咁估啦，如今拖呀拖，窒住唔公布，乃是因係人都推測美國聯儲局9月減息。而銀債定息率完全睇住美國息率而行，若定得太高而美國減息，以今時今日政府財政狀況， 多半厘已是天文數字支出，點頂？斷估應該睇埋9月美國點郁手再算，如此，在財務安排上比較安全。
但講真，各位老友記又毋須太緊張，因講到底，以過去八期銀債發行睇，次次認購都爆晒額。咁即係點？即係你 幾十元至幾百萬元落去都冇意思，因太公分豬肉，人人一律只得咁多，最終分幾手畀你，都係唔鹹唔淡，冇大茶飯食。
只是，話雖如此，若你已六十歲，仍應該入紙認購，因此乃有如生果金及醫療券，純屬政府為長者而設的派福利行為，當然 ，作為自己對香港多年貢獻的些微獎勵。
