歐洲國家盃開鑼前，小弟在本欄高調指出，針對外圍賭博，警方必定做場「大龍鳳」，以作震懾。
這個並非靠估，而是常識。你做一哥都會趁這「最佳時機」作場「示範表演」啦。
果然上周開始「臨軒」行動第一步，拘捕外圍佬骨幹艇仔等五十七人。其實小弟覺得買外圍者正豬頭。少少讀過經濟理論也必知，有個名詞叫「機會成本」（Opportunity Cost），做任何事都要付出成本，你在抉擇時就要問自己一句——值嗎？
賭外圍，請問你慳得幾多錢？一萬元？五萬元？十萬元？但你咁就正正觸犯香港法例第148章《賭博條例》當中「向收受賭注者投注」，一經定罪，最高監禁九個月及罰款五萬元，另留案底。
五萬元事小，但留有案底已無謂，更甚可能要 監。任何有理智者，都知根本冇「值博率」啦！你 以為有，咁就抵你凡賭必輸 ，因成隻豬咁蠢。
我睇，警方的「臨軒」行動，上周只是響警號，根本未到高潮。幾時？進入半準決賽啦。當「全民皆波」風潮席捲，大量平時唔賭的市民也可能「少少 」落注，加上為牙骹好，為社交好，都會賭埋一份，此時最合警方吼準幾個大外圍集團，作雷霆一擊，起網拉人。
波照賭，馬照跑，去到季尾，冠軍練馬師之爭仍精彩！今晚牌面呂健威強少少，因有直落四W未斷纜的「合夥奔馳」作擂台躉，擺明車馬搏大命；另安排兩隻不明物體「包裝天將」及「好瑪威威」亮相，未知何事。呢場要 住「晶晶日上」，因兩隻老虎（另一為「八駿巨昇」）在陣，必有得分，今季出七次有三Q一P三第四，隨時起筷！
伍廄今晚只得「嘉應喝彩」似樣。
總之，今晚又係波馬齊飛快樂死。
