曾智華
一直難明，為何全球所有地方電影的粗口頻率，會與美國片差咁遠。
莫話中日韓泰印\u22ef\u22ef各國片，就算同是西方世界的歐洲片，以至用純正英語的英國片，全部很少涉及粗獷動作及性器官的攻擊性粗口，但美國片呢，幾乎是無粗不歡。
最奇，似乎電檢的尺度，在這方面，荷里活片也是大大寬鬆得多。
上周打風，在家重溫三十年前經典警匪片《盜火線》，劇中的躁狂警探由阿爾柏仙奴飾演，也是句句粗口，似乎唔爆粗就唔識講\u5622。
前日速速入場睇萬眾期待的《一戰再戰》（《One Battle After Another》），哇哇，使唔使咁玩法？以小弟觀看美國片六十年計（10歲前冇得睇），真的從未見過美國大片會粗鄙成咁。片中無論男女老少，做乜職業，乜\u5622背景，全部爛口怪，一律開口就爆粗。
主角李安納度更加粗上加粗，真有角色需要？睇完真的想去洗耳，因兩小時四十分咁長，由開場第一幕耳根就受轟炸。
呢套戲其實頗多值得欣賞的地方，最勁為大師級導演保羅安德遜，絕對高卡士，有人指佢將呢套電影拍到史詩級，形容恰當。此君電影技巧純熟外，領導全個製作組的功力，荷里活A級。
三位影帝擔演，辛潘極度搶眼，為演好陰陰濕濕心理不平衡老警官，由外型至身形（操到爆肌），皆明顯花盡心思去塑造，就算簡單如行路姿勢，也睇得出頗有細緻的考究。
李安納度又如何？服晒，套套挑戰新難度。《一》片中扮演內心充滿矛盾的前革命狂熱分子，由年輕演到半放棄自己的頹老，有機會再問鼎下屆奧斯卡。
《一戰再戰》並非人人適合的茶，但對電影製作及演技有要求的影迷，必定滿足。
