參加戀愛真人騷《女神配對計劃》的關嘉敏（Carman），面對3位追求者「星二代」姜卓文（細John）、年薪過200萬的投資銀行家黃家俊（Matthew）及蘭桂坊攝影達人劉榮業（Andy）舉棋不定。30歲曾拍過5次拖的Carman，由墮入三角地獄初戀，到遇到圈中渣男舊愛，透過兩段血淚情史，令Carman創傷覺醒，堅持唔要花心靚仔及複雜的圈中人。 採訪：方騫平 攝影：林賓尼 場地：彌敦左岸
關嘉敏在節目中審慎觀察追求者，直認細John屬心儀類型：「感情要了解先知啱唔啱」，但星二代背景觸動陰影：「唯一佢係圈中人，我有啲恐懼症。」Carman大讚Matthew談吐令人舒服，卻強調：「有經濟能力唔會加分。」她直言在節目中尋找合適男友甚難：「就算有feel都要經過了解及溝通啦，唔係三言兩語就揀到。」她指觀眾比她更著急：「𠵱家喺街上好多人會對我講：『畀心機出啲力呀！但記得寧缺莫濫。』佢哋個個好似變咗媽咪咁，不停鼓勵叫我加油。」
初戀男踏兩船傷透心
被封為女神的Carman，然而情路上卻多次遭遇背叛，經歷坎坷，尤其被初戀傷透，令她無辜成為「第三者」，充滿痛苦回憶，她說：「18歲初戀，男友係混血兒靚仔，原來當時男友與前度關係仍未斷清，佢前度知道我嘅存在，我反而被蒙在鼓裡，因此無辜被攻擊。好記拍拖4個月時一齊過聖誕節，初戀男友謊稱去踢波，原來約會前度食聖誕大餐兼送禮物，情敵就喺fb度tag我晒佢哋合照同禮物相。」後來她竟選擇原諒，結果3人糾纏長達兩年：「我哋試過當街大吵大鬧，最離譜係，佢前度仲不停傳淫照及曖昧留言嚟刷存在感，令我考DSE前夕崩潰大喊，最後更發現男友私藏好多佢嘅嘢，hurt得真我係太深刻啦，打後兩年都唔敢拍拖，對靚仔留有陰影，好怕佢哋好花心。」
情傷烙印變節日殺手
除了初戀外，跟某位圈中渣男藝人的戀情同樣令她心碎。雖然她並冇開名指證渣男舊愛是誰，但按過去歷史，她和前天堂鳥成員葉泓聲（Gordon）再見亦是朋友；除他之外，4年前傳過Carman暗撻「造星仔」陳宗澤（CY）。Carman傷心道：「佢喺我生日當日大發脾氣唔肯影相，對我屋企人態度好差，最後仲嬲到走咗。」此舉令父母極度心痛：「我未見過雙親咁嬲，佢哋不滿話『佢當你係乜呀？佢唔會對你好㗎喎，你唔覺得似湊仔咩？』見父母咁唔開心我都好痛心，幾日後決定分手。」更不堪的是，「後來知佢背住我多次出軌，因為分手後啲女仔陸續出嚟講真相，甚至同我道歉，原來兩年間佢背住我『食』得幾多嘅，我唔係精明嘅人，唔會懷疑人。所以驚咗，太複雜嘅行內人唔係拍拖首選。」
靠自己拒嫁筍盤「上岸」
Carman堅持要物色一位思想一致，肯支持她追夢的對象：「我擇偶不嬲唔會睇錢，係父母灌輸嘅觀念，教我如果鍾意嗰個人，就算一齊搵都係開心，正係父母嘅親身經歷，主要係睇有冇上進心。」她自爆曾獲一位年長7歲的商人猛烈追求，對方攻勢包括「每日會送99枝花，送足一星期」及送上小禮物，送到連她媽媽都驚呼「又嚟？」。雖然被視為可讓她「上岸」的「筍盤」，但她因價值觀不合而婉拒：「我feel到佢唔想我拋頭露面，想養起我。」對此她非常抗拒：「其實都冇嘢衰得過初出道時（戶口剩8毫子）狀態啦，我真係唔想日日都冇嘢做，冇機會追夢，加上我最接受唔到我另一半唔支持我做呢行，我會好唔舒服，就算放棄筍盤都冇後悔。」
