(曾智華)
議價，從來是個藝術。大至國與國之間，小至租戶與業主，都是一場腦筋比併。
特朗普擺明開天殺價，然後，睇邊個多牌、邊個緊張，你腳軟，佢就偷你雞，希望盡取著數，這方面，由佢做生意經驗而來。但一去到國與國之間層面又掂唔掂呢？三幾個月虛張聲勢霸住國際舞台做大喇叭，好似好勁。不過，若你有底氣，有分析能力，有策略，就可睇死狂特，其實日日在Bluffing（虛張聲勢），故此，你唔縮佢就縮，改去嘈嘈閉恰另一小國遮醜。
最近重整舊稿作理材課程Notes用，睇到2022年自己在《投資王》的大字標題：警告/忠告——買賣物業劈價皆要狠。
小弟並沒有水晶球，只基於眾多客觀因素分析，透視物業價格勢必大幅調整，故提議入貨、出貨兩皆應大幅劈價。結果，三年後回望，若當時你出貨不大幅劈，出唔到，損失更大。而買的，若\u510d\u5413\u510d\u5413還價只減半成，如今真是抌心抌肺。
前日陪朋友睇樓，睇\u5571的單位，開價八百三十萬元，佢衝動想落訂，因好喜歡。我勸：「咪住，你可知此單位市價？未知就落訂，可能做\u5497水魚喎。應該做的，係睇返過去半年同座向相若層數的成交價，然後再還價。如今大量二手盤湧出，又有相當多難以成交，故此買家最吃香呀。二手業主要與地產商爭客呀！大家都急於去貨！」
一查之下，果然，原來3月份高一層的成交價七百二十萬元，低一層的則為七百萬元。老友睇中的一間叫八百三十萬元？獅子開大口？
小弟建議：「咁啦，話畀經紀聽，已睇過上兩月成交價，冇可能開咁高，有誠意交易就降到七百萬元，但有一、二十萬元水位走盞。」
結果點，有待下回分解了。
