通常只有新聞版才會令人火滾，因見到全球不少政客亂咁嚟，不公不義，個別簡直魔鬼上身，極其好戰，用盡一切藉口殘殺平民，令人髮指。
每早當我睇到眼火爆新聞時，會立即「轉台」，改睇娛樂版、馬經版、體育版，降降溫，免傷身。當然也會睇財經版，因久不久就會發覺財路明燈，可以跟進，以及在本欄披露，希望惠及讀者老友。
債券息率逾4厘至5厘
不過罕有地，上周四打開財經版，真係「媽媽聲」，因等咗大段日子的港鐵公司（066）發行債券，竟然唔「益」小股民，只益班大孖沙，何其唔公平？港鐵債券有極高評級，幾乎全冇風險，而息率則有4點幾到5點幾厘，年期則有10年、15年及30年，買咗基本冇得輸之餘，若是退休者，更可視作如銀債一樣的安享晚年收息工具。
港鐵係乜公司？絕對屬於香港人的公司，大股東是政府，而無數小市民則是小股東，因持有其股票，理應有着數先益自己人！
港鐵點解要發債？正因未來有非常大型網絡拓展計劃，以及要更新提升營運資產，這些皆是非常健康的正面投資，絕非有甚麼冒險的胡亂擴張，與其向銀行借，不如發債向市場集資，更為理想。
點解只益大公司？
其實小弟早已留下大筆現金，準備港鐵一公布發債詳情，立即瞓落去申請。點知等呀等，等呀等都冇公布。
到有公布時，真係火都嚟埋，原來個150億美元債務發行計劃，首30億美元份額只「內部認購」（有啲鬼祟！），隨即被本地及國際大機構掃清，包括主權基金、保險公司、資產管理公司，銀行及證券集團。呢個決定究竟邊個下？點解只益大公司？當中有乜考慮過程，有冇人可以公開？
港鐵財務總監樊米高揚言對反應熱烈好鬼高興，但我地大班香港市民及港鐵小股東就馨過辣雞！若果餘下來的120億債券額發行再只益「特權分子」，我真係會絕食抗議㗎！
資深傳媒人 曾智華
相關文章：
