由李家鼎、黃亞保、林正峰、倪樂琳（Ellyn）主持的《鮮美湛江美景遊》，於昨晚及下周日（16日）晚10點翡翠台播映，為觀眾介紹湛江美景及美食。今次是Ellyn首度主持綜藝節目，難得她全程零怯場表現自然之餘，口齒亦相當伶俐，經常孖住鼎爺和保哥啄住林正峰！
對於獲應屆港姐冠軍同行，鼎爺和保哥讚不絕口，輪流大讚Ellyn知書識禮兼「美貌與智慧並重」；反觀兩位大前輩對林正峰則一味喪踩，更一度將最細粒的蠔分給林正峰，與獲得超級肥美靚蠔的Ellyn相映成趣，差別待遇令人捧腹大笑。
昨晚播出的第1集，4位主持先走訪湛江漁人碼頭，見識了難得一見的超大條鷹鯧魚之餘，Ellyn還獻出了人生第一次「活捉龍蝦」；之後，4人在前香港先生呂熙帶領下，品嘗新鮮現撈湛江蠔，原來是次也是Ellyn人生首度吃蠔，原因是她覺得蠔很腥，但自從這次旅程開了「蠔戒」後便停不下了，除品嘗了原汁原味的清蒸生蠔，還品嘗了芝士焗蠔、菠蘿焗蠔、酸菜蠔及泰式蠔！
Ellyn首次食沙蟲及泥丁
除了海鮮，4位主持還品嘗了足料的湛江撈粉、特色雞煲以及馳名的麻章燒豬。在這一集的美食之旅中， Ellyn還品嘗了當地特色美食：沙蟲及泥丁。Ellyn坦言也是人生第一次食沙蟲及泥丁，故要鼓起很大勇氣才做到：「好大突破，成世都冇辦法想像會將佢哋擺入口！我本身已經好怕蟲，更加唔好話擺入口，但為咗拍攝我就鼓起勇氣試食，原來都OK嘅，尤其炸沙蟲，只要你唔好諗住佢係沙蟲就得。而用泥丁煲嘅嗰啖粥，係我咁多年以嚟食過最鮮甜嘅。」
談到首度主持綜藝節目零怯場，Ellyn說全靠3位前輩支持及照顧：「佢哋3個都有傍住我，我記得拍第1個item其實NG咗幾次，但佢哋都有叫我唔好緊張，之後適應咗慢慢去返正軌。鼎爺同保哥真係好照顧我，保哥會夾餸畀我哋，鼎爺就教咗我好多嘢，我記得頭一、兩日，鼎爺見到我有啲位唔記得入（要講嘢），佢會輕輕拍我，提我要講嘢喇，又教我講長稿嘅秘訣。」
