政府今（26日）公布新一份《財政預算案》，財政司司長陳茂波表示，為有效打擊非法賭博活動，政府將積極探討規範籃球博彩活動，並邀請香港賽馬會提交建議，意味政府為籃球博彩合法化開綠燈。
市民鄭先生對有關建議表示OK，「本身其實都有外國波，如果要開源節流，搵地方增加收入都係好事，香港都多人留意NBA或其他地方的籃球賽，開多條路俾人合法投注都OＫ，好過非法，有正途稅收，好過cut（減少）社會資源嚟幫補支出。」
相關報道：財政預算案2025︱探討規管籃球博彩 馬會：打擊非法賭博重要舉措 短期內交詳細建議
他又不認同有關做法是鼓勵賭博，「賭博擺喺度，可以選擇去做定唔做，唔係我擺咗喺度，你就一定要去做。當然措施出咗嚟，有好多軟措施要跟進，例如教育講座，落社區宣傳，點樣適量賭博係怡情，唔好大賭，唔好賭到身家、性命財產都拎晒出嚟。」
市民梁太對於籃球博彩合法化不大認同，「香港太多賭博。就係唔係幾好，足球已經賭到啲人儍吓儍吓，賭埋籃球，助長賭風唔係幾好。」
違例泊車定額罰款擬增加 職業司機叫苦
對於政府擬提高俗稱「牛肉乾」的違例泊車定額罰款，由現時的320元增加至400至480元，提高25%至50%。鄭先生認為此舉是用錢去嚇人。「條街都好多死車，好多違例泊車，唔入錶，根本唔關罰款金額的事，而係教育同駕駛者心態問題，車位問題一向喺香港都係嚴重短缺，與其拎多啲地去起樓，不如諗下點樣改善啲措施等香港市民唔好咁辛苦爭個車位。提高罰款，收入係幫到手，但都要控制支出。」
而職業司機陳先生對增加牛肉乾罰款，則極不滿意，「我哋揸車租兩個位好重皮，唔合理，加得犀利得滯。」市民梁先生亦牛肉乾加價直言對車主好慘，「可以加，唔好太多，影響市民，反而增加泊車位好啲！」
