雖然我是個影癡，數十年來個個星期鑽電影院，但與影圈中人一個都唔熟，所以，下筆寫觀後感，純粹我手寫我心，不涉任何感情。
去年11月睇完《破．地獄》後，在此發表了兩篇專欄：一、最佳電影誕生了；二、《破．地獄》的最大驚喜。
當時指出，《破．地獄》理應獲最佳電影、最佳編劇、最佳導演、最佳女主角及最佳男配角。至今天，我的看法絲毫無改變，雖然從金像獎候選名單看，對手全部非常之強。
好多人問：「喂！碌Sir，香港電影評論學會完全唔係咁睇喎，只話呢套戲屬推薦電影之一，其他食白果呀！」香港人崇尚自由，包括對電影評論的自由。當然，你咁評，會有人評返你轉頭，例如資深電影人文雋就大大聲指結果的謬誤處，難得，佢老哥乃此會開山祖師。
若大家相信消費者真金白銀一人一票直選，相信客觀標準，相信觀眾眼睛是雪亮的……當然會認同《破．地獄》的高水平之處。
今年電影金像獎，候選名單水準極高，尤以最佳女主角，竟然吳君如也未能入圍，相信佢自己也有點意外吧。
至於最佳男主角，冇人會出奇點解冇黃子華。事實，佢雖為票房磁石，但論演技，仍離不開「黃子華」。我睇今屆乃劉青雲與郭富城之爭。林 的確畀人耳目一新之感，但論演技，仍未到影帝級。
另一難下判斷項目為最佳女配角，全部超水準，尤其《破．地獄》的韋羅莎及梁雍婷出場不多，但震撼性極大，邊個奪獎都令人心服。
喜見過去一年，香港出 幾套超優質電影，影圈工作者應引以為傲，希望大家繼續努力！只要有好電影，觀眾必定會願意入場的！
