本欄讀者應知，小弟是港產電影的忠貞支持者，幾乎凡有新戲上映就入場。不過 不過乜？暫時無法解釋，面對三套賀歲片，罕有的反應就是「無食欲」。事實，似乎不只我，每天打開個入場表，套套都唔多收得，難道「人同此心」？
新年假期咁多時間，我當然仍會入戲院，咁睇邊套？決定睇套「大吉利是」片。內容觸及主角患上末期癌症，部署如何離世，一切由自己決定，不理他人、俗世，甚至法律的規範。
一套咁冷門片，當然流行院線冇安排放映啦，只得真正為影癡服務的小眾戲院上映，例如百老匯電影中心。
不吉利之外，個戲名更是零吸引，叫《隔壁的房間》。一般觀眾看見個名，即時感覺必定是—— 乜呀？毫無吸引喎！
不過，奇，起初我都以為必拍烏蠅，故臨開場才施施然走去買飛，但行埋櫃 一睇個座位表，喂，唔係嘛，滿 八成？新正頭喎。
證明總有不少影癡似我，聞到好戲就入場，絕對百無禁忌。
此片難得兩大奧斯卡影后承諾上陣，並由頭帶到尾，一為蒂達史雲頓，另一為茱莉安摩亞。單單睇佢兩個晒殿堂級演技，已經值得入場兩次。第一次純整體欣賞，第二次是拆解兩人的細緻演繹技法。
《隔壁的房間》名字點解咁「怪雞」，都係唔劇透 ，大家一於入場睇啦，保證有一個窩心的感性旅程，再加埋眼睛極度舒服的享受。
此片除兩位主角的巔峰演技外，西班牙導演艾慕杜華，也是功力非凡。三位高手一齊出擊，立即摘下威尼斯影展金獅獎。
小弟長年支持「安樂死」（難道支持「不安樂死」咁變態？）及自己掌握「善終權」，故此，對《隔壁的房間》的劇情推進，有切身的感受。
