三十年前開始，因工作極度高壓（大量咪前幕前台前再加管理層），開始精神及血壓出問題，從此成為威院精神科及QE心臟科常客，每半年覆診一次。
QE覆診前一星期，先抽血驗，見醫生時，分析報告。多年來，控制高血壓是個難題，故此由一隻藥開始變成兩隻，再變三隻，同時，也要「啪」膽固醇藥，就此不覺已經三十年。
這三十年的經驗加閱讀國際醫學報告，理解壓力對健康產生極大問題，精神情緒病之外，更會製造壞膽固醇及令血壓飆升。
不少人誤會膽固醇由飲食而來，只中一半，另外就是遺傳及壓力。所以，若你不減壓，怎戒口也會壞膽固醇偏高。
講返我自己，畀人印象，日日大吃大喝，早就應該唔爆血管都通波仔。但至今七十有一，半次波仔都冇通過，連我問QE主診醫生使唔使驗 血管，佢都話唔使。
「曾先生，你有冇氣喘頭暈心口痛 ？又有冇手部麻痹、口齒間中不清、睇 疊影 ？」
政府醫院資源寶貴，若冇跡象，當然不會無情情畀你驗。醫生話：「其實每半年驗血，已可睇到好多跡象。」
上周四又覆診，L醫生話：「咦，你膽固醇、糖尿指數、炎症指數（導致血管栓塞）都好靚，肝腎功能冇問題，一定係食得好清，嚴守戒口 ，繼續啦。」
唔講由自可，去到最後兩句，我幾乎忍唔住「咭」聲笑出來。事實，我邊鬼度有戒口 ，血越來越「靚」，主因過去十年 夠、運動、大幅減壓，就此而已。總之，高壓工作一律拒絕，只搞快樂飯局。
昨晚話畀老友聽驗血結果，「型佬燦」立即衝口而出：「喂呀，多餘啦，你肯定係調亂其他病人個報告啦，咁食都冇問題，邊有天理 ？」
