美股最新重大消息，係4年、5,000億美元AI基建投資項目Stargate，由甲骨文（ORCL）、OpenAI、軟銀合組公司，最有趣係由美國總統特朗普親自宣布。雖然呢個屬於私人投資項目，但估計美國政府將會成為呢個項目嘅最終大客。
原因係，特朗普政府正需要改善美國政府效率去節約成本、去紓緩赤字以至美債高築嘅問題。如果由美國政府去直接投資數據中心會即時加重負擔，如果攤分年份去租用數據中心嘅話，亦方便吸引科技公司幫手。由甲骨文參與因為呢間公司業務並冇涉及利用數據營銷，避免政府數據被私人企業濕一濕腳。整件事嘅鋪排令人相信美國政府將透過成為大客去參與其中。
當中受惠股，除咗甲骨文之外，就係英偉達（Nvidia，NVDA）以至其供應鏈股份，包括Vertiv（VRT）、Dell（DELL）、Amphenol（APH），以及一批數據中心設備股，例如Arista Network（ANET）。
資金由Tesla回歸Nvidia
最新消息係，Tesla嘅馬斯克（Elon Musk）出嚟吐槽，話Stargate項目當中，軟銀出錢只有100億美金，OpenAI嘅創辦人Sam Altman隨即衝出嚟反駁。再加上Nvidia嘅HBM供應商SK海力士業績後股價下跌3%，與此同時，市場亦擔心日本央行聽日議息宣布加息。
種種消息，暫時令Nvidia盤後下跌1%，其他受惠股甲骨文、VRT、ANET、ARM等等亦有回吐。不過，目前股價遠未充分反映AI投資計劃嘅利好，預計後市大漲小回。無論成交、期權市場情況，都顯示資金由Tesla回歸Nvidia，估計呢單嘢嘅受惠股，包括甲骨文以至Nvidia供應鏈股份嘅強勢，尚未終結，稍後繼續向上。
晉佳
相關文章：
特朗普上任四出點火 美股未來兩年跌市機會逾四成 林本利：看看美國哪些人捱不住
