本欄畀的賽馬貼士，中正廣東佬常用形容詞——一啖砂糖一啖Z。
上周三以為告東尼大舉出擊，結果貼士累街坊，白果食到成口泡。
上周日又如何？突然馬神上身，話明第七場上次勝出的五匹唔使睇，W的應該是「球星」。結果騎騎騎，中到應，W有66.5元，二重彩拖「競駿輝煌」派193元，唔算肥仔水，但已經夠幾餐兩 飯。
靜靜話你知，上周日小弟最嗌爆玻璃的，為第六場三班泥地千二米。大熱又係「軟硬鞭」潘頓隻「德心知遇」，熱到二點九倍，當然唔會拖次熱一Q啦，傻的嗎？
研究之下，發覺有隻二十多倍的初出馬「假面騎士」，外地跑膠泥千二兩次，一W一Q，1月3日試閘衝刺力極強勝出。講都唔信，閘前行圈十九倍，最後入閘二十八倍。
騎師為南非仔董明朗，絕非甚麼高手，今季在上周日前只贏過四場，有三場來自蘇偉賢，兼且次次冷，這個數據極之重要！
「假面騎士」再安排董明朗騎，我當然冇大信心，只是二重彩拖埋佢，複式穿三隻有飛馬，包括「德心知遇」、「智跑得」及「越野大師」。呢場一入直路，唔使嗌，偷笑已夠。因擺明放頭的「假面騎士」Sure Win，其他全部只有食塵份，包括幾隻熱門！結果「智跑得」第二，講都唔信，二重彩竟派2419元，呢場一棍贏夠法國生蠔加澳洲龍蝦 。
今晚主力研究第四場二班一千米，正路之選當然又係「軟硬鞭」的「天天同樂」。佢老哥騎四次三W一Q，又抽一檔，唯一考慮是未跑過快活谷。次選「年少多好」，近兩次同程跑二及三，必須尊重。冷冷 要埋法國仔貝知仁隻「狀元及第」啦，短途好耍家。
