MC張天賦一共五場的《This is MC 2 LIVE IN MACAU》演唱會在澳門倫敦人綜藝館舉行，昨晚（4日）第4場演出，MC在開場環節一口氣又唱又跳多首歌曲；但到第二部分busking分享環節，MC和現場歌迷打招呼時，語帶沙啞兼鼻音有點重，隨即在台上致歉表示自己是抱恙演出。最新消息指，MC身體嚴重不適，今晚（1月5日）澳門演唱會宣佈取消，剛剛他在現場見傳媒，身穿厚衣，戴口罩、頸巾的他表示︰「真係好抱歉，試咗幾次綵排，唞氣都痛，唔好意思，大家記得kepp番飛。」歌迷大叫「等你」、「支持你」、「休息多啲」。
MC昨夜在舞台上不停講對唔住？
昨晚，MC完騷前再次表示抱歉未有以最好狀態演出，直言：「好耐冇試過咁，多謝每位入場觀眾嘅支持令我捱到！」患大感冒的MC昨午綵排時一邊抹鼻水一邊唱歌，試唱了幾首歌後隨即返後台休息，上台前再食藥控制病情。演唱會甫開唱三首歌，觀眾察覺不到MC異樣，直至與昔日busking戰友Goo Chan合唱完後，才發現MC鼻音非常重及聲音變啞，他說：「好抱歉，冇盡好歌手職責，冇好好keep好自己身體，幾個鐘前係超級病，而家我都係好渾渾噩噩，但無論如何，會用百二分精神去唱歌畀大家聽，你哋嘅歡呼聲都會幫我嘅喇叭注入能量。」現場觀眾即報以掌聲鼓勵。之後的演出，MC一說話就鼻音重，慶幸唱歌未見大影響；到演繹高難度又要飊高音的歌曲時，仍能保持高水準，不過原定落台握手環節就臨時取消，MC遺憾表示：「非常抱歉，今日未必可咁近距離見大家，因為病菌真係非常之犀利，為了歌迷健康、安全，抱歉我落唔到嚟！」
當演唱最後一首歌《世一》後，MC終於鬆一口氣：「必須再多謝每位入場觀眾！哎！幾辛苦都好，終於捱到呢到！今朝3點幾醒咗，我好耐未試過咁唔舒服，必須再一次提醒大家，小心身體，保重身體！再次多謝每一位入場觀眾嘅支持，令我捱到！」演唱會結束後，MC整個人有點體力不支，由工作人員扶住火速回酒店，以爭取休息，應付今晚的尾場演出。
