上周日賽馬好好睇，不是因為小弟再符碌貼中「精算暴雪」，而是睇該日「騎師王」變化及第十場蔡神仙部署，安排「氣勢」變「冇氣勢」及「精算暴雪」突變「馬王」級的工於心計。
先講「騎師王」，絕對戲劇性，第一至第五場，講都冇人敢信，開票賠率一百二十五倍的周俊樂竟勝出三場，遠遠彈離；此時，大熱的潘頓，僅得兩場第二；次熱的麥道朗，則一W一第三，要追，好似難若登天 。此時周俊樂賠率急跌，正常又合理。不過，小弟一睇，喂，乜麥道朗竟然唔多郁。即係點？即係幕後人有百分百信心佢會反勝。結果，「劇本」正是如此，老麥第七場開始，在兩大澳洲同鄉高手潘頓及布文「發軟蹄」夢遊馬場下，連勝三場，成功變「騎師王」，保住天文數字的投注額。
當日「軟硬鞭」潘頓又再玩軟鞭，尤其是第十場輸隻「氣勢」最為惡睇。呢隻大熱馬，次次出閘皆以天生速度先彈離對手，再輕鬆贏馬的。呢場，奇！佢出閘竟唔湯唔水，畀內欄馬頂住時冇發力，入直路只居中游。就此，廄侶「精算暴雪」可以好易咁跟佢屁股跑。神奇現象最後二百米上演，潘頓突然輕輕外斜，讓出空檔畀「精算暴雪」發力，一騎就有，早幾場無大表現的馬，突變「馬王」，輕易彈離兩個馬位W出，騎者為本季「發霉之星」、呢場前仍未開齋的賀銘年！
蔡神仙回復馬場魔術師真身，服未？
今晚快活谷跑十場，快活谷，人人都話方仔最勁，係真唔係真？錯！廖康銘至係。必須留意佢兩隻：「經典時代」，高質新馬，霍宏聲早前專誠上從化試閘，一推勝出，勇銳！「發財鴻星」上次跑千八米，放到臨尾才輸少少，今次縮程，可以 人！
