國慶長假展開，香港處處逼滿內地遊客，好事，尤其加上股市沖喜，產生財富效應，人人覺得荷包多 錢咁，使得必定比較豪。
事實，上周出街晚飯，也有明顯的旺勢。
不過，年紀越大，越怕人山人海逼逼貢，既然10萬計遊客殺到，自己一於讓開。去邊？易，快過打針，個半小時又飛台北。
可能人同此心，心同此理，周一出發，非公眾假期，竟然全機爆滿，一個位都冇剩，真係咪話唔誇張。
抵 台灣，第一感覺為見證佢 對任何肉類、蔬果皆有種驚恐症，全部來客未過海關及入境櫃位，已要排長龍，做乜？正是將隨身行李全部過X光機。
一路排，擴音機不斷大大聲警告，切勿帶入肉類產品及蔬菜生果，否則重罰20萬新台幣！氣氛相當嚴肅。
我前面位女遊客行去過機，即被截停，職員火速戴上膠手套檢查，原來行李內有一支飲品，同樣要「驗屍咁驗」。
入境後，跳上的士，直駛早早預訂的JR東日本大飯店。此酒店1999年落成，前身為台北傳統著名的「台北六福皇宮」，建築設計最吸引為中庭特大，躺臥在大堂向天際望，有無盡舒泰之感，去年住過一次，上癮，今年再「卜」。
「六福」結業後，JR東日本集團將整幢酒店改裝，並負責管理，日本人的仔細，不同凡響。
放低行李，速速醫肚，行過兩條小街，已有一間相當不俗的牛肉麵，名「東館」，由3位年輕人主理，親切簡單，開放廚房。
點了3份涼菜，2碗牛肉麵、1碗水餃、1份滷豬手、1罐汽水。3人食得飽飽的，埋單只220港元，平香港最少三分一。
水準又如何？中上，牛筋腩夠腍夠入味，麵條彈牙，湯水清鮮，全收晒貨。
