蔣祖曼（Joman）在《法證先鋒VI：倖存者的救贖》演國際名模「Nana」，要極速減磅兼首次挑戰搞笑戲份，多得偶像黃宗澤（Bosco）傍住，搞笑冇難度。下個目標想拍古裝，就算被工作人員撥冷水，夏天拍古裝熱到癲都唔理，非常堅持。 採訪：杜杜 攝影：朱偉彥
曾任模特兒的Joman，知道要演國際名模，即用生酮方法瘦身，邊拍邊減咗15磅，嗜甜的她最痛苦是戒口，「好多朋友生酮咗好耐，畀咗好多貼士我，仲幫我準備咗好多即食包，最難係戒甜，我真係好鍾意飲檸檬茶同食朱古力、雪糕，唯有食冇糖朱古力頂住。」睇劇本時另一個擔心，就是角色是自戀的港女，「都驚會唔會好乞人憎？！監製話角色好有趣唔使擔心，睇落『Nana』雖然自戀，但嗰份我行我素係幾可愛。」
演村姑都冇問題
劇中有不少搞笑場口，Joman多得好拍檔黃宗澤幫手，「我拍慣正劇，好少做古靈精怪嘢，Bosco喺現場幫咗好多，佢本身搞笑底，會一齊度啲得意嘢！」Joman曾表示不夠膽望住Bosco，她強調並非講笑，「我真係唔夠膽望住佢，連同佢講嘢都唔敢，除咗埋位拍嘢，記者會都係第1次合照，佢好nice，係我問題，我係好I嘅人，對住佢有啲緊張。」同偶像Bosco合作完未夠喉，Joman想再合作，「做咩都得，做返佢粉絲囉！哈哈！」
Joman簽TVB已2年多，可以劇接劇好滿足，今年更加願望成真，試到想拍好耐的喜劇和動作戲，「好開心今年拍咗《武林》，角色打得勁又好癲。」她希望未來可以實現埋拍古裝的願望，「之前《輕·功》戲中戲拍咗少少古裝戲，雖然夏天喺郊區拍古裝，好熱好辛苦，但試咗1、2日幾好玩，工作人員話得1、2日梗係好玩，成套拍就知味道喎！不過我仍然想試吓，就算演村姑都OK㗎！」
