人人話自己客觀公正，其實人人都唔會客觀公正，因總有個人信仰、傾向、利益、價值觀 令到你只能站在自己個「井」睇 。
當然，理性的人會嘗試跳到「井」外看事物，不過，一到落判斷，就要返回個「井」！
中美博弈，你站在美國立場，當然唔能夠容忍中國崛起，因會影響多年建立予取予攜的霸權地位，呢個涉及太多既得的一切。總之，你接近少少都必定搞殘你，唔好同我講道理忠奸正邪。一去到國家大利益層次，乜都做得出。
倒轉中國，會否因美國長期為所欲為，連聯合國都懶理，就擺明買你怕，乜都唔發展，連阿二都唔敢做，寧願做你附庸馬仔，聽晒你點？此乃國恥！在中國人眼中，邊個咁做邊個下台！
世事處處皆一樣，冇乜對錯，問題你企邊個位，以邊個立場去睇事。
世界大局勢如此，小至藝人與電視台也如此。已經多年冇人提及「雪藏」藝人的手段，最近又因「炎明熹事件」炒熱。
資深電視觀眾，當然記得早年的TVB「雪」人無數，邊個跳草裙舞「雪」邊個，「雪」到你冇晒人氣硬晒（可能未完約甚長 ），等你約滿返出 ，市場價值大跌。
人，總傾向鋤強扶弱，故此，多罵無線霸道， 乾 盡藝人而只畀少少騷錢，完全不理會藝人真正身價，如此，當然種下離心，加上外邊甘詞厚幣，怎不動心？
思考呢個問題，簡單，嘗試自己坐上無線決策層去諗就有所領會。電視台用龐大宣傳資源及黃金時段再加密集訓練，捧到你咁紅，當你飛上枝頭時，畀人一引就想「收割」？仲要跳到敵對機構？若你得，其他幾百個藝員仲使管？老友，知否乜叫江湖道義？
