(曾智華)
多年前經常有人批評TVB冇新意,凡有套劇掂,就不停拍I、II、III、IV 續集,直至拍殘拍爛為止。
上世紀九十年代初,訪問當年無記製作總監劉天賜,佢陰陰嘴回應:「阿碌,做電視又好,電影也好,凡捉正一條市場受的大『橋』,當然食到盡啦,因收視方程式擺在眼前,唔玩盡?有冇咁蠢呀?即如入賭場買大細,若你買大而鋪鋪開大,當然繼續買大,直至斷纜啦?呢個做法,絕非只得TVB,全球電視台及電影公司皆如是!」
故此,你會見到快六十二歲的湯告魯斯,拍一集又一集的《職業特工隊》、《壯志凌雲》、《烈探狙擊》 五十九歲的奇洛李維斯一集又一集的《殺神》拍下去,已到第五集。香港的甄子丹又如何?六十歲了,也不停演《葉問》,第五集了。
最新上畫,由五十五歲韋史密夫擔正的《重案夢幻組》系列,也拍到第四集。
睇呢類拍完又拍電影,次次我都會抱著好奇心入場——究竟今次點超越上次呢?
相信「唔衰得」的幕後及主角,也會有呢種心態,新一套點可衰過上套?故必有新噱頭、新驚喜,而不會只炒冷飯。
今片名又長又噚的《重案夢幻重組再重組》,我排隊買飛時,前面幾位冇一個講得出片名,真有點失敗。
幸而出來的水準,絕對收晒貨。次次睇《重案》,都似火熱天時將冰凍啤酒向喉嚨灌,充滿快感。當然呢類電影,你不能要求甚麼深度或信息,但官能刺激及搞笑方面,必能滿足。
今次呢部,劇本也無乜新意,但臨尾的海陸空大戰,則拍出荷里活A級水準。更勁,見證無人機殺敵的威力(這正是目前全球開戰用上的犀利武器)!畀幾十蚊入場,抵到爛!