有阿伯不滿搭巴士上車只開單邊門，大發雷霆，炫富兇女車長：「我大把錢多過你！」未料女車長連爆金句反擊，字字珠璣，掀起網民熱議。
涉事為九巴23M路線，循環來往樂華及順利，當時正前往牛頭角巴士站，過程如下：
不滿單邊門上車 阿伯炫富兇九巴女車長：「我大把錢多過你！」車長連爆金句反擊網民激讚↓↓↓↓
有網民發片發帖表示，本周一（20日）搭巴士時，遇到離譜情況，「個阿伯上車嘅時候話巴士司機開單門，跟住係到發脾氣拍門，仲要報埋警。」
樓主表示，該名阿伯「最好笑佢話小巴都開曬兩道門(btw小巴得一道門)」，樓主認為該阿伯無理取鬧，「其實一道門都上到車唔知佢做乜要發哂癲？阻住哂啲人，真係冇嘢搞揾嘢嚟煩。」
樓主公開現場影片，可見阿伯站在車長駕駛座旁大發雷霆，當時巴士正在行駛中，女車長反問阿伯：「呢㗎係咪小巴呀？」估計為反駁阿伯指「小巴都開曬兩道門」之說。
阿伯拿著手機似在報警，女車長強調：「我唔同你嘈啦，我係開單門㗎啦，你報（警）啦，去樂華（巴士總站）等我。」
「唉，窮人多要求」
阿伯怒道：「你先嘈……開單門，好！無問題！」繼續專注按電話報警，女車長無奈自言道：「啲廢老，又無錢，又多嗲！」阿伯聞言即向司機位怒揮手機道：「我無錢？我大把錢多過你呀！」女車長回應道：「哎呀，多謝囉！」
這時阿伯將孭袋及雨傘丟在地上，似欲專心按電話報警，女車長繼續大爆金句反擊：「唉，窮人多要求，你請過司機開部車，開4道門畀你都得啦！」
女車長又再重申：「巴士開單門，無規定開雙門，除非輪椅、傷殘，你係咪傷殘呀？」阿伯即怒斥：「我唔係傷殘？睇住呀，我做過手術添呀！」
「唔開門？你飄入嚟嘅咩？」
由於阿伯一直站在駕駛座旁，女車長警告阿伯：「你依家騷擾緊我揸車呀！」阿伯反駁：「我騷擾緊你揸車？你自己唔開門畀我啫，有咩理由唔開門㗎？」女車長再以金句回應：「唔開門？你飄入嚟嘅咩？」
這時阿伯終成功致電報警，大聲讀出巴士編號及路線等資料，又向警員投訴指車長「叫佢開另一道門，佢唔肯開……」由於阿伯聲如洪鐘，女車長再警告：「你依家騷擾緊我揸車呀！你去後面講呀！」
「我停低啦，頂唔順啦！」
但阿伯未有理會，繼續站在駕駛座旁大聲報警，女車長最後無奈向車內乘客表示：「我依家駛埋一邊，呢個人係到攪事，唔好意思！」阿伯聞言未有退縮繼續向警員投訴：「佢無停低，仲係到開緊！」女車長聞言一語雙關地說：「我停低啦，頂唔順啦！」
帖文引起熱議，不少網民批評阿伯無理取鬧：「唔上咪唔好上，的士都係開一道門㗎！」「係咪見係女車長，就覺得好蝦呢。」「都已經上咗車，仲嘈乜Ｘ嘢，真係討厭！咁勞氣，小心爆血管！」
巴士開單門上車有原因？網民估：防打尖或過大行李
有網民估計車長開單門有原因：「開單門原因：司機要控制上車嘅人流，以防有人唔比錢上車。」「有d司機專開單門，防打尖，或過大行李。」
有網民則認為開雙門可以方便長者上巴士：「老人家可能要扶住至上車，開單門可能無咁易上，開門祇㩒個制，點解唔開埋？」
不過，有網民則指出單門的扶手，反有助長者上巴士：「其實開單門佢先有手位扶住，開晒2隻門距離太遠，好難扶。」有網民又特別指出事件中阿伯非常「生猛」，不似難上車：「你睇吓佢，㗎車一路開，佢都企得咁穩陣，洗Ｘ扶咩。」
九巴乘客須知列明，嚴禁使用任何恐嚇、侮辱、辱罵或不恰當的言語或動作，或以任何其他方式騷擾車長或車廂內之乘客。
來源：ching_thc0312＠Threads
同場加映：巴士阿叔拒摺BB車大戰女車長 女車長嘆好人難做：我等埋你仲Ｘ我老母 最後咁處理↓↓↓↓
