陳健安日前與歌迷會「本原族」逾百族人慶祝生日，兼歌迷會成立三周年紀念。現場布置多個打卡位，族人一家大小到賀，與安仔玩遊戲、唱歌、抽獎、合照、切生日蛋糕，玩到又笑又叫，非常盡興。生日願望除了夾公仔得心應手，大家身心健康，安仔希望在更大場地再舉行個唱。
喜見歌迷會日漸成長
安仔在自己生日狂送禮物和海報、與粉絲齊玩遊戲、即場親手刨西瓜冰，還自攜喇叭首唱新歌《額頭有字》，讓族人先聽為快。看見歌迷會日漸成長，安仔感安慰說：「歡迎新『族人』，亦多謝一直支持我嘅舊『族人』，我哋嘅相遇永遠都係不遲不早。唔使擔心好遲先認識我，最緊要有認識。好多謝你哋嘅愛，我會繼續做好多作品，希望我唱歌每次都有進步。」安仔透露剛收到新歌歌詞，即將錄音，族人都興奮歡呼。
感激族人花盡心思為他生日
在玩遊戲時安仔和兩位司儀嗌到聲嘶力竭，好搞笑。安仔更加插驚喜，首唱新歌《額頭有字》，還全場大合唱，他開心到跳吓跳吓，他讚歎：「呢個版本係無可取代！」他續說：「我好開心！一入場見到啲布置好靚，一年靚過一年，佢哋知我喜歡嘅嘢都整晒出嚟。睇吓個生日蛋糕，有我鍾意嘅元素！佢哋整咗啲盲盒，內有不同款嘅手機磁吸，仲有隱藏版，識玩！」安仔感激族人為他生日花盡心思。他有回禮：「我精挑咗好多夾嘅公仔送畀大家，以sweet為主題，例如一對對嘅公仔或者甜品系列，希望大家鍾意。」期間安仔誤認小新妹妹是小新女友，全場爆笑。
去更大場地開騷
生日正日，安仔表示會去踢足球，而生日願望，他說：「鍾意夾公仔嘅朋友，包括我，順利夾到想夾嘅嘢。我繼續做歌、唱歌繼續進步。大家身心健康，自在寫意！」至於開演唱會，他說：「單飛至今都有廿幾卅首歌，近年又多咗啲新歌。上次喺麥花臣開咗4場，但都有歌迷話買唔到飛，希望喺更大嘅場地開騷。呢個唔只生日願望，係目標。」
